बंगालको मदिरा नेपाल हुँदै विहारतर्फ तस्करी

विराटनगर । भारतको बिहारमा मदिरा प्रतिबन्धित छ । नजिकैको पश्चिम बंगाल प्रान्तमा भने खुल्ला छ । बंगालबाट मदिरा बिहार लैजान त्यहाँको सीमानामा कडाइ गरिने भएपछि तस्करले नेपालको बाटो प्रयोग गर्ने गरेको पाइएको छ ।

बिहारबाट कार लिएर बंगाल गएका एक ब्यक्ति दुई लाख रुपैयाँ मुल्य बराबरको मदिरासहित झापाको कांकडभिट्टामा मंगलबार पक्राउ परेका छन् । नेपाल भारतको सीमा पार भएपछि मेचीनगर भन्सारको गेट पछाडि आइपुगेको कारलाई इलाका प्रहरी कार्यालय कांकडभिट्टाले चेकजाँच गर्दा रक्सी र बियर फेला परेको छ ।

बीआर २२ एफ ५०५१ नम्बरको कारको सीटमा फल्स बटम बनाएर माउण्टेन ह्वीस्की दुई सय ५४ बोतल र सुपर स्ट्रोङ बियर २४ बोतल लुकाइएको थियो । 

कारको सिट डिकीलगायत बिभिन्न भागमा सो रक्सी लुकाइएको अवस्थामा फेला परेको जिल्ला प्रहरी कार्यालय झापाका प्रहरी नायव उपरीक्षक कृष्णकुमार चन्दले जानकारी दिएका छन् । 

कार चालक भारतीय नागरिक जितेन्द्रकुमार पासवान र कारलाई प्रहरीले नियन्त्रणमा राखेको छ । कार र मदिराको अनुमानित मुल्य नौ लाख ९८ हजार नौ सय रुपैयाँ मुल्याङ्कन गरी मेची भन्सार कार्यालयमा बुझाइएको प्रहरीले बताएको छ । 

पश्चिम बंगालमा खरिद गरेको मदिरा मधेस प्रदेशको सिरहा जिल्ला हुँदै भारत लैजान लागेको चालक पासवानले प्रहरीलाई बताएका छन् ।

भारतमा तिहारलाई सबै भन्दा ठूलो उत्सवका रुपमा मनाईने भएकाले कारोबारीले त्यसतर्फ मदिरा लैजान नेपालको बाटो प्रयोग गर्ने गरेको बताइएको छ । 

सिरहाको नाकाबाट भारत प्रवेश गर्न सजिलो हुने भएकाले पासवानले सो रुट प्रयोग गर्ने गरेको अनुमान गरिएको छ । भारतबाट नेपाल मदिरा भित्र्याउँदा राजश्व तिरेर ल्याउने प्रावधान छ ।