तीन राससकर्मी पुरस्कृत

विराटनगर । सरकारी समाचार संस्था राष्ट्रिय समाचार समिति (रासस) को ६४औं वार्षिकोत्सव कार्यक्रममा कोशी प्रदेशबाट तीन जना पुरस्कृत भएका भएका छन् । उत्कृष्ट जिल्ला समाचारदाताका रूपमा धरानकी संगीता राई पुरस्कृत भइन् । 

उनलाई कोशी प्रदेशका आन्तरिक मामिला तथा कानुनमन्त्री रेवतीरमण भण्डारीले २० हजार रूपैयाँसहित प्रमाणपत्र प्रदान गरेका हुन् ।

त्यसैगरी उत्कृष्ट आलेख विधातर्फ झापाकी विशेष समाचारदाता चन्द्रकला भण्डारी पुरस्कृत भएकी छन् । उनले १० हजार रूपैयाँ प्राप्त गरेकी हुन् । पत्रकार भण्डारीले लेखेको ‘बढ्दैछ आत्महत्याको कहर, छैन रोकथामको चासो’ भन्ने आलेख उत्कृष्ट भएको थियो ।

रासस कर्मचारी संघद्वारा स्थापित ‘वासु रिमाल यात्री स्मृति पुरस्कार–२०८१’ बाट रासस कोशी प्रदेशका कार्यालय विराटनगरका वरिष्ठ समाचारदाता मोहम्मद सदरूल पुरस्कृत भएका छन् । उनलाई ७ हजार ७७७ रूपैयाँसहित प्रमाणपत्र प्रदान गरिएको छ । 

पुरस्कार वितरण कार्यक्रममा बोल्दै मन्त्री भण्डारीले प्रदेश सरकारले ल्याएको आम सञ्चार विधेयकलाई सकेसम्म मिडियामैत्री बनाउने बताए । 

उनले मिडियालाई नियन्त्रण गर्ने मनसाय सरकारको नरहेको स्पष्ट पारे । 

‘मिडियाले जनतामा निराशा मात्रै बाँड्ने र उत्साह मारिदिने चलन बढेको छ’ मन्त्री भण्डारीले भने, ‘मिडिया नभएको भए लोकतान्त्रिक गणतन्त्र यति सजिलै आउने थिएन, आलोचनात्मक बन्दा सकारात्मक पनि हुनुपर्छ भन्ने हाम्रो अपेक्षा रहन्छ ।’