इजाजत बिनाको बिग अस्पतालमा शिलबन्दी

विराटनगर, २३ कात्तिक : सरकारी निकायबाट स्वीकृति नलिई सञ्चालनमा रहेको विराटनगरको बिग अस्पताललाई बिहीबार सिल गरिएको छ । विराटनगर–७ स्थित अस्पताल चोकमा रहेको सो अस्पतालमा पुगेको सरकारी टोलीले उपचाररत बिरामीलाई सरकारी अस्पतालमा सार्न निर्देशन दिंदै सिल गरेको हो ।

बहिरंग विभाग, आपत्कालीन कक्ष, ल्याव, प्रशासन र काउण्टरमा लाहाछाप लगाई सिल गरिएको विराटनगर महानगरपालिकाले जनाएको छ ।

त्यहाँ उपचाररत १७ जना बिरामीलाई सरकारी अस्पतालमा सार्न निर्देशन दिइएको छ । विराटनगर महानगर, जिल्ला प्रशासन कार्यालय मोरङ, जिल्ला प्रहरी र जिल्ला स्वास्थ्य कार्यालयको संयुक्त टोली अनुगमनमा पुग्दा पत्रकारलाई दुर्ब्यवहार गर्ने अस्पतालका कर्मचारी रोशनकुमार यादवलाई प्रहरीले पक्राउ गरेको छ ।

महानगरका स्वास्थ्य महाशाखा प्रमुख हैदर अलीका अनुसार इजाजत नलिई सञ्चालनमा रहेको सो अस्पताललाई गत बैशाखमा चेतावनीसहित निर्देशन गरिएको थियो । अस्पतालले पूरा गर्नुपर्ने मापदण्डहरू १२ वटा बुंदामा निर्देशन गरिएको भए पनि हालसम्म पूरा नगरी सञ्चालन गरेको पाइएकाले बन्द गर्नुपरेको स्वास्थ्य प्रमुख अलीले बताए । 

उनका अनुसार अस्पताललाई ४८ घण्टाभित्रमा प्रकृया पूरा गर्न निर्देशनसमेत दिइएको छ । यसैबीच सरकारी अनुगमन टोलीसँगै गएका सञ्चारकर्मीलाई दुर्ब्यवहार गर्ने सोही अस्पतालका कर्मचारी रोशनकुमार यादवलाई प्रहरीले पक्राउ गरेको छ । यादवले सञ्चार उपकरण खोस्ने एवं पत्रकारलाई अस्पताल बाहिर निकाल्ने प्रयास गरेका थिए । 

सञ्चारकर्मी वीरेन्द्रकुमार साह र शेख हुसेनले अस्पताल प्रमुख डा.विशाल अग्रवाल र यादव बिरुद्ध अभद्र ब्यवहारमा कारवाही गर्न प्रहरीमा जाहेरी दिएका छन् । पत्रकार महासंघ मोरङ, प्रेस युनियन र प्रेस सेन्टर लगायतले दोषीलाई कारवाहीको माग गर्दै विज्ञप्ति जारी गरेका छन् । पक्राउ परेका यादवलाई अभद्र ब्यवहारमा मुद्दा चलाइने मोरङका प्रहरी नायव उपरीक्षक रञ्जनकुमार दाहालले बताए ।

सो मुद्दामा कसुर हेरेर आरोपीलाई प्रमुख जिल्ला अधिकारीले सजाय गर्छन् । यादवले अनुगमनमा गएको सरकारी टोलीलाई समेत असहयोग गरेको प्रहरीले बताएको छ । बिग अस्पतालमा सरकारी टोलीले छापा मारेपछि कोशी अस्पताल आसपासमा दर्ता बिनै चलेका क्लिनिकहरू पनि दिउँसो बन्द गरिएका थिए ।

प्रदेशकै ठुलो सरकारी अस्पताल कोशी अस्पताल आसपासमा दर्जन बढी साना ठूला निजी अस्पताल रहेका छन् । यीमध्ये केही दर्ता नगरिएको र एजेन्टले बिरामी ल्याएकै भरमा मात्रै चलेका छन् ।

सरकारी अस्पतालमा आउने बिरामीलाई फकाएर उपचारको बहानामा सम्पूर्ण स्वास्थ्य परीक्षण गर्न लगाउने कोशी अस्पतालको आसपासमा दुई दर्जन जति क्लिनिकहरू रहेको बताइएको छ ।