बिष्ट स्मृति प्रतिष्ठानद्वारा छात्रवृत्ति वितरण

विराटनगर । तेजबहादुर–कृष्णमाया बिष्ट स्मृति प्रतिष्ठानले सुनसरीको बराहक्षेत्र नगरपालिका वार्ड नं. १ बगुवास्थित भगवती आधारभूत विद्यालयका विद्यार्थीहरुलाई शैक्षिक सामाग्री वितरण गरेको छ ।

कक्षा शिशुदेखि कक्षा ५ सम्म प्रथम, द्वितीय र तृतीय हुनेलाई छात्रवृत्ति र अन्यलाई शैक्षिक सामग्री वितरण गरिएको प्रतिष्ठानले जनाएको छ ।

विद्यार्थीहरूलाई स्कूल ब्याग सहित शैक्षिक सामग्री प्रदान गरिएको प्रतिष्ठानका अध्यक्ष अबिजाल बिष्टले जानकारी दिए ।

बिष्ट परिवारका सात भाइ छोराहरू मिलेर आमाबुबाको नाममा स्थापना गरिएको तेजबहादुर–कृष्णमाया बिष्ट प्रतिष्ठानको अक्षयकोषबाट प्राप्त ब्याज र थप रकमबाट  हरेक वर्ष विद्यालयको बार्षिकोत्सवमा शैक्षिक सामग्रीहरु वितरण  गर्दै आएको अध्यक्ष बिष्टले बताए ।

कार्यक्रममा बराहक्षेत्र नगरपालिकाका मेयर रमेश कार्की, विद्यालय ब्यवस्थापन समितिका अध्यक्ष राजु थापा लगायतले प्रतिष्ठानलाई धन्यवाद दिएका थिए ।