राजधानी युवा क्लवको अध्यक्षमा ५ को उम्मेदवारी

विराटनगर । मानिसलाई काम भन्दा पनि पद चाहिएको छ । खेलमा आजीवन चासो नहुनेले पनि पदमा दाबी गरेपछि विराटनगर–३ स्थित राजधानी युवा क्लवको कार्यसमिति सर्वसम्मत हुन सकेन । 

विराटनगरमा ब्याडमिन्टनका लागि सबैभन्दा सुबिधायुक्त कवर्डहल भएको सो क्लवको शनिबार दोस्रो अधिवेशनमा अध्यक्ष पदका लागि ५ जनाको उम्मेदवारी परेकाले सहमति हुन नसकेको हो । पहिलो अधिवेशनमा कार्यसमितिमा बस्नका लागि क्लबका संस्थापकहरुले धेरैलाई खुसी पारेर ल्याउनु परेको थियो ।

अध्यक्ष पदका लागि हालका अध्यक्ष राजु ढकालसहित नर्बु लामा, भीमकुमार राई, अमरकुमार इजम लिम्बू र खड्गप्रसाद शर्माले उम्मेदवारी दिएका छन् । पहिलो अधिवेशनमा ढकाल र राई दुबैको उम्मेदवारी परेकाले राईलाई वरिष्ठ उपाध्यक्षमा राखिएको थियो । तर उनले पदबाट राजिनामा दिएपछि उपाध्यक्ष टेकबहादुर निरौलालाई सो पद दिइएको थियो । यस पटक भने सहमतिका लागि  लामाले अध्यक्ष पदमा दिएको उम्मेदवारी फिर्ता लिएका छन् । 

वरिष्ठ उपाध्यक्षमा निरौला, महिला उपाध्यक्षमा फुलथुँगा खतिवडा, सचिवमा केदारबहादुर कटुवाल र कोषाध्यक्षमा धनकुमार श्रेष्ठ सर्वसम्मत भएका छन् । खुल्ला उपाध्यक्षमा मोहन रायमाझी र रुपेश भट्टराईको उम्मेदवारी परेको छ ।

सहसचिवमा नवराज काफ्ले र सुभाष घिमिरेको उम्मेदवारी परेको छ । 

सचिवमा योगेन्द्र शर्माले उम्मेदवारी फिर्ता लिएका थिए । सदस्यहरुमा राजु पौडेल, भीमलाल श्रेष्ठ, हस्तबहादुर कार्की, जीवन बोगटी, पम्फा प्रधान र सञ्जय चौधरी सर्वसम्मत भए । क्लवलाई योगदान नदिएका मानिसहरु पनि निर्वाचनमा हाबी देखिएका छन् । 

ब्याडमिन्टनका लागि म्याट भएका दुई वटा कोर्ट सहितको हल विराटनगरमा राजधानी युवा क्लवको मात्रै छ । सांसद अमनलाल मोदीले पहल गरेपछि लाखौं मूल्य पर्ने म्याट हलमा लगाइएको थियो । 

क्लवको हल भने प्रदेश सरकारका तत्कालिन सामाजिक विकास मन्त्री जीवन घिमिरेले बजेट उपलब्ध गराएपछि निर्माण भएको थियो । 

त्यसपछि तत्कालिन मेयर भीम पराजुलीले हलका लागि बजेट दिएका थिए । हाल क्लबसँग दुई तले ब्यायामशाला पनि निर्माण भईसकेको छ । 

बिधान बिपरित निर्वाचन समितिले वरिष्ठ उपाध्यक्ष र महिला उपाध्यक्षमा उम्मेदवारी लिएको बताइएको छ । निर्वाचन समिति सदस्य नवराज पोखरेलले उमेदवारहरुसँगको छलफलपछि निर्वाचनको मिति तय गरिने जानकारी दिए ।