कटहरीका महिलाको प्रजनन स्वास्थ्य परीक्षण

विराटनगर । मोरङको कटहरीका एक हजार बढी महिलाहरुको प्रजनन् स्वास्थ्य परीक्षण गरिएको छ ।

रिप्पल नेपाल चितवनको प्राविधिक सहयोग तथा कोकन विराटनगरसँगको सहकार्यमा कटहरी गाउँपालिकाले आयोजना गरेको प्रजनन स्वास्थ्य सम्वन्धी निशुल्क जाँच र शल्यक्रिया शिविरमा १ हजार २ सय ४० महिलाको सहभागिता रहेको कोकन अध्यक्ष मञ्जिता उपाध्यायले जानकारी दिइन् ।

पुस २ देखि ५ गते सम्म कटहरीका दुई स्थानमा आयोजना गरिएको शिविरमा पाठेघरको समस्या भएका महिलाहरुको संख्या अधिक पाइएको छ । 

शिविरपछि विराटनगरमा आयोजित अन्तरक्रियामा चिकित्सकको टोलीले कटहरीका महिलामा प्रजनन रूग्णता अधिक रहेको पाइएको बताएका थिए । 

प्रजनन् स्वास्थ्य परीक्षण गरिएकामध्ये ५९ जना पाठेघरको मुखको क्यान्सर हुनुभन्दा अघिको चरणमा रहेको पाइएको स्वास्थ्यकर्मी रुपा कर्माचार्यले जानकारी दिइन् । 

परीक्षण गरिएका मध्ये १८५ जनामा आङ खस्ने समस्या रहेको र ५९ जनालाई रिङ पेसरी लगाइएको कर्माचार्यले बताइन् । 

परीक्षणका क्रममा पाठेघरमा संक्रमण भएका महिलाको संख्या पनि धेरै रहेको पाइएको छ ।

विराटनगरको सीमा जोडिएको भए पनि कटहरी गाउँपालिकाका महिलाहरुमा प्रजनन रूग्णता अधिक देखिएकाले स्थानीय सरकारले विशेष ध्यान दिन आवश्यक देखिएको चिकित्सकहरुले गाउँपालिकालाई सुझाव दिएका थिए । शिविरमा शल्यक्रिया गर्नुपर्ने अवस्थाका २४ जनाको तत्काल चितवन मेडिकल कलेजमा शल्यक्रिया गरिने भएको छ ।