विराटनगरमा म्यूजिक फेस्टिभल हुने

विराटनगर । अघिल्लो वर्ष हुन नसकेको तेस्रो संस्करणको विराट म्यूजिक फेस्टिभल (संगीत महोत्सव) यसपटक हुने भएको छ ।

मंगलबार आयोजित पत्रकार सम्मेलनमा म्यूजिक फेस्टिभलका कार्यक्रम संयोजक सन्तोष महतले कात्तिक १० गते शनिबार विराटनगरको जैन भवनमा म्यूजिक फेस्टिभल हुने बताए ।

विराटनगरस्थित लाइभ इन्टरटेनमेन्टको आयोजनामा नेपालीहरुको महान चाड वडादशैं, तिहार र छठ पर्वको समय पारेर गरिएको हो । उक्त म्यूजिक फेस्टिभलका माध्यमबाट गीत संगीतका दर्शक श्रोतालाई मनोरञ्जन प्रदान गरिने महतले बताए । 

उनले विगतमा दुईपटक सफलतापूर्वक म्यूजिक फेस्टिभल आयोजना गरिसकेका कारण यसपटक पनि भव्य रुपमा कार्यक्रम हुने दाबी गरे । म्यूजिक फेस्टिभलमा नेपालका ख्यातिप्राप्त गायक तथा कलाकारहरुको बेजोड नृत्य र सांगितिक प्रस्तुति रहने उनले बताए ।

विराटनगर महानगरपालिका मुख्य प्रवर्द्धक रहेको उक्त म्यूजिक फेस्टिभल आयोजना गर्न १४ लाख रुपैयाँ खर्च हुने जनाइएको छ । यसपटक चर्चित गायक तथा ब्याण्ड स्वप्न सुमन एण्ड दि एस्ट्रेस, पूर्ण राई एण्ड दाजुभाइहरूको मुख्य प्रस्तुति रहने जनाइएको छ ।

थप आकर्षणका रुपमा विराटनगरका ख्याति प्राप्त संगितकर्मीहरुको समूह विराटनगर म्यूजिसियन ग्रुपको सांगीतिक प्रस्तुति तथा विराटनगरको स्थानीय डान्स क्लवहरूले नृत्य प्रस्तुत गर्ने जनाइएको छ ।

फेस्टिभलमा स्थानीय परिकारहरुको स्वाद दिन खाना स्टलहरू र कार्यक्रम प्रयोजकका पनि स्टल रहने छन् । म्यूजिक फेस्टिभललाई भव्य बनाउन अन्तर्राष्ट्रियस्तरको साउण्ड सिस्टम, लाइट, लिड स्क्रिनको प्रयोग गरिने जनाइएको छ ।