बार काउन्सिलमा राजु ढकाल विजयी

विराटनगर/ नेपाल बार काउन्सिल (नेपाल कानुन व्यवसायी परिषद) को कोशी प्रदेश सदस्य (पार्षद) का लागि शनिबार सम्पन्न निर्वाचनमा राजु ढकाल (इनरुवा) विजयी भएका छन् । ढकालले प्रतिस्पर्धी बालकृष्ण आचार्य (विराटनगर) ले भन्दा २७ मत बढी ल्याई विजयी भएका हुन् । 

विजयी ढकाल कांग्रेस समाजवादी सहितको गठवन्धनका उम्मेदवार थिए भने आचार्य एमाले, माओवादी, राप्रपा लगायतका बाम र देशभक्त गठवन्धनका उम्मेदवार थिए । 
संघमा एमाले र नेपाली कांग्रेसको संयुक्त सरकार चलिरहको अवस्थामा बार काउन्सिलको चुनावमा भने उनीहरु छुट्टाछुट्टै प्यानल बनाएर मैदानमा उत्रिएका थिए ।

 कानुन व्यवसायीहरूको छाता संगठन नेपाल बार एसोसिएसनको केन्द्रीय निर्वाचनको पूर्वसन्ध्यामा वृहत् प्रगतिशील, गणतान्त्रिक, समाजवादी, स्वतन्त्र, देशभक्त, समावेशी गठबन्धन बनेको हो । उक्त गठबन्धनमा नेकपा एमालेनिकट वकिलहरूको संगठन पीपीएलए, माओवादीनिकट आरपीएलएएनका साथै पीएलए, एनपीएलए, एफएलए र एएनएलए गरी  ६ दल निकटका संस्थाहरु छन् । 

बार काउन्सिलको यस  निर्वाचनमा एमाले र माओवादीका उम्मेदवारलाई जिताउने र त्यसपछि फागुन २३ मा हुने नेपाल बारको निर्वाचनमा साझा उम्मेदवार बनाएर जाने सहमतिमा हस्ताक्षर भएको छ ।

सहमति पत्रमा एमालेनिकट पीपीएलएका अध्यक्ष भोजराज आचार्य, माओवादीनिकट आरपीएलएका अध्यक्ष रमणकुमार श्रेष्ठ, विप्लव नेकपानिकट पीएलएका अध्यक्ष कपिलचन्द्र पोखरेल, मोहन वैद्यनिकट एनपीएलएका अध्यक्ष देवकुमार मोक्तान र जसपानिकट एफएलएका अध्यक्ष दीपक राईले हस्ताक्षर गरेका छन् ।

यस्तै एएनएलएका अध्यक्ष अधिवक्ता पदम राउतले पनि छुट्टै वक्तव्य जारी गरी प्रगतिशील, राष्ट्रवादी, पेशागत समूहका उम्मेदवारलाई समर्थन गर्ने जनाएका छन् ।  
कानुन व्यवासायीहरुको नियामक संस्था नेपाल बार काउन्सिलको पदेन अध्यक्षमा महान्याधिवक्ता, पदेन उपाध्यक्षमा नेपाल बार एसोसिएसनका अध्यक्ष, कानुन व्यवसायीहरुको मतदानबाट निर्वाचित सात प्रदेशका एक–एक जना गरी सात जना र  र मनोनित दुई गरी  एघार सदस्यीय हुन्छ । समितिको सदस्य सचिवमा नेपाल सरकारका न्यायसेवाका उपसचिव हुने व्यवस्था छ । 

काऊन्सिलको सो निर्वाचनमा मतदानका लागि अधिवक्ता र वरिष्ठ अधिवत्ताले मात्र हुने व्यवस्था छ । कोशी प्रदेशमा नौ सय ६६ मतदाता थिए  । निर्वाचनमा कोशी प्रदेशको इलाम, झापा, धनकुटा, विराटनगर, उदयपुर गरी पाँच स्थानमा मतदान केन्द्र थियो  ।