'कोशी प्रदेश पर्यटन वर्ष २०८२' का लागि बनेनन् ठोस कार्यक्रम

विराटनगर । कोशी प्रदेश सरकारले ‘कोशी प्रदेश पर्यटन वर्ष २०८२’ का लागि ठोस कार्यक्रम तयार पार्न ढिलाइ गरेको छ । पर्यटन वर्षका लागि ठोस कार्यक्रम नबन्दा मन्त्रालयमा रहेको पर्यटन वर्षको सचिवालय पनि गतिविधिविहीन बनेको छ ।

प्रदेश सरकारको पर्यटन, वन तथा वातावरण मन्त्रालयमा सचिवालय स्थापना गरिएको छ । सोही मन्त्रालयका मन्त्री सदानन्द मण्डलको संयोजकत्वमा रहने निर्देशक समितिमा भविषकुमार श्रेष्ठ र कृष्णकुमार साह सहसंयोजक चयन भएका छन् । 

राजनीतिक भागबण्डा मिलाएर मान्छे नियुक्ति गर्ने र मुल आयोजक समितिको बैठकका नाममा तामझाम मात्रै गर्ने काम भएको टिकाटिप्पणी हुन थालेको छ । श्रेष्ठ कांग्रेसको कोटाबाट सहसंयोजक नियुक्त भएका हुन् भने साह एमालेको भागबाट नियुक्त भएका हुन् ।

मन्त्रालयले पर्यटन वर्षका लागि कार्यक्रम तयार गर्नुपर्नेमा त्यसमा समेत राजनीतिक दवाव आउन थालेको कर्मचारीहरूले बताएका छन् । दवावकै कारण २०८२ साललाई प्रदेश पर्यटन वर्षका रुपमा मनाउन ८२ वटा गन्तव्य चयन गर्न कठिनाइ भएको जनाइएको छ ।

मन्त्रालयले माघ १० गते सुनसरीको कोशीटप्पुमा पर्यटन वर्षको तयारी बैठक आयोजना गरेको थियो । उक्त बैठकमा मन्त्रालयले कोशी प्रदेश पर्यटन वर्ष २०८२ का लागि ८२ वटा गन्तव्यको मस्यौदा सूची बाँडेको थियो ।

उक्त सूचीमा ८२ वटा निश्चित गन्तव्य तोकिनुपर्नेमा एउटा जिल्लाको एउटै नम्बरमा अलग–अलग गन्तव्यका रुपमा चिनिएका पाँच वटासम्म गन्तव्यलाई एकै ठाउँमा उल्लेख गरिएको पाइएको छ । जसका कारण उक्त बैठकमा सहभागी धेरै सहभागीले अनौठो मानेका छन् ।

पर्यटन वर्षको सचिवालय भनिए पनि सहसंयोजकको नेमप्लेट राखिएपछि कर्मचारीहरूले भने अनौठो मानेका छन् ।

‘सचिवालय भनेपछि त मन्त्रालयको कर्मचारी रहनुपर्ने हो’ एक कर्मचारीले भने, ‘सहसंयोजकको कार्यालयजस्तो गरी सचिवालय बनाइएको छ, वहाँहरू आएर केही काम गरेको पनि देखिएको छैन ।’