माओवादी अभियान मोरङमा, जनलहर देखिएको भन्दै प्रचण्ड उत्साहित

विराटनगर । झापाबाट सुरु भएको नेकपा माओवादी केन्द्रको तराई मधेश जागरण अभियान मंगलबार मोरङ आइपुगेको छ । झापाबाट मोरङ आइपुग्दा ‘पार्टीको पक्षमा देखिएको जनलहर’ ले अध्यक्ष पुष्पकमल दाहाल प्रचण्ड उत्साही देखिएका छन् ।

सोमबार झापाका विभिन्न सभालाई सम्बोधन गरेर मोरङ आइपुगेका उनले मोरङ आइपुग्दा आफू अझै उत्साही बनेको बताएका हुन् । जनतासँग माओवादी तराई मधेस जागरण अभियानअन्तर्गत मोरङको कानेपोखरी गाउँपालिकाको रमाइलो बजारमा आयोजित खबरदारी सभा तथा दोस्रो गाउँ सम्मेलन उद्घाटन गर्दै उनले ‘माओवादी र यसको एजेन्डाप्रति देखिएको आकर्षणले पूर्वमा रातो सूर्य उदाएको’ घोषणा गरेका हुन् । 

प्रधानमन्त्रीबाट हटेपछि देशव्यापी अभियानमा रहेका प्रचण्डले यसबीचमा धेरैपटक आउँदो चुनावमा गठबन्धन नगर्ने अडान दोहोर्याउँदै आएका छन् । झापा र मोरङका कार्यक्रममा पनि उनले त्यही प्रतिबद्धता दोहोर्याएका छन् । 

‘आगामी चुनबमा गठबन्धन राजनीतिको भुल दोहोरिने छैन’, उनले भने ‘कहिले कांग्रेस त कहिले एमालेसँग गठबन्धन गर्दा उनीहरूलाई फाइदा भयो, बरु माओवादीलाई घाटा भयो ।’ 

झापाको कचनकवलबाट सुरु अभियानअन्तर्गत मंगलबार मोरङका रतुवामाई, कानेपोखरी हुँदै धनपालथानमा कार्यक्रम सम्पन्न भएको छ । 

बुधबार पनि मोरङका विभिन्न स्थानमा जागरण सभा हुने र त्यसलाई अध्यक्ष दाहालसहितका शीर्ष नेताले सम्बोधन गर्ने कार्यक्रम छ । 

माओवादीले जनसभाका क्रममा विभिन्न पार्टी त्यागेर माओवादीमा प्रवेश गर्नेहरूलाई यस अवसरमा स्वागत पनि गरेको छ ।

अभियानको उद्घाटनका क्रममा रिसाएर बोल्दाबोल्दैको माइक छाडेका  वरिष्ठ उपाध्यक्ष नारायणकाजी श्रेष्ठ भने झापाबाट काठमाडौं फर्केर चितवन पुगेका छन् । उनले चितवन पुगेर झापाको घटनाप्रति माफी पनि मागेका छन् । 

मंगलबार चितवनमा पत्रकारहरूसँग कुराकानी गर्दै वरिष्ठ उपाध्यक्ष श्रेष्ठले आफूले बोल्न सुरू गर्नै लाग्दा मनोवैज्ञानिक अवरोधजस्तो उत्पन्न भएको बताए । 

‘मैले सुरूआतमात्रै के गरेको थिएँ अलिकति मनोवैज्ञानिक अवरोधजस्तो उत्पन्न भयो त्यसले मलाई बिझायो नै । त्यो सत्य हो, त्यसलाई सामान्य घटनाकै रूपमा लिन आग्रह गर्छु’, उनले भने ‘मैले प्रस्तुत गरेपछि शुभेच्छुक, शुभचिन्तक र आम सर्वसाधारणले पनि त्यसो नगरेको भए पनि हुन्थ्यो । सहेको भए पनि हुन्थ्यो भन्नुभएको छ । जसलाई त्यस्तो नभएको हुन्थ्यो भन्ने परेको छ जसलाई चित्त दुखेको छ । ती सबैप्रति सकारात्मक धारणा राख्दै क्षमायाचना गर्छु ।’ 

पार्टीको ‘जनतासँग माओवादी तराई–मधेश जागरण अभियान’ थालनी गर्ने कार्यक्रम सोमबार झापाको बनियानीमा हुँदै गर्दा उद्घोषकसँग रिसाएर उनी मन्तव्य नटुंग्याइ बसेका थिए ।