विराटनगरका मूलवासी अधिकारका लागि संघर्ष गर्दै

विराटनगर/ विराटनगरका मूलवासी विराट राजवंशीले आफ्नो अधिकारको लागि १८ वर्षदेखि शान्तिपूर्ण संघर्ष गर्दै आएको छ । राष्ट्रिय जनजाति प्रतिष्ठानमा आफ्नो जातिलाई छुट्टै सूचिकृत गर्न माग गर्दै उनीहरुले प्रत्येक वर्ष गर्दै आएको वृहत भेला यस वर्ष पनि मंगलबार सम्पन्न गरेको छ । 

विराटनगर स्थित  हिमालयरोडमा गरिएको सो कार्यक्रममा वन वातावरण तथा पर्यटन मन्त्री सदानन्द मण्डलले राज्यले विराट राजवंशीलाई आदिवासी जनजातिमा सूचिकृत गर्नुपर्नेमा जोड दिए । उनले संविधानमा सम्पूर्ण जातजातिलाई पहिचान दिने उल्लेख रहे अनुसार राज्यले विराट राजवंशी जातिलाई पनि सुचिकृत गर्नुपर्ने जिकिर गरे ।  
सरकारबाट प्राप्त भएको कोटालगायत राज्यबाट पाउने सेवा सुबिधाबाट बञ्चित रहेको बिराट राजवंशीलाई छुट्टै सुचिकृत गरी सेवाको उपभोग गर्न दिनु पर्नेमा जोड दिए । 
 विराट राजवंशीहरुले आदिवासी जनजाति उत्थान राष्ट्रिय प्रतिष्ठानमा सुचिकृत गर्न, राज्यको हरेक अंगमा विराट राजवंशीको स्थान सुनिश्चित गर्न, प्रदेश तथा संघमा समानुपातिक रुपमा प्रतिनिधित्व गराउन, विराटनगरको प्रथम जातिको रुपमा विराट राजवंशीलाई घोषणा गर्न, विराट राजवंशीको उत्थानको लागि प्रत्येक तह र अंगमा छुट्टै आरक्षणको ब्यवस्था, विराट राजवंशी बसोवास भएको क्षेत्रलाई विराट राजवंशी स्वायत्त परिषद ब्यवस्था गर्न र विराट राजा दरवारलाई पर्यटक क्षेत्रको बिकास गर्नुपर्ने गरी  ७ बुँदे माग राख्दै आएको छ ।

वृहत भेला अगाडि संसारीमाई स्थानबाट निक्लिएको र्‍याली बजार परिक्रमा गर्दै महेन्द्र चोकमा पुगेर बृहत भेलामा परिणत भएको हो । कार्यक्रममा विराट राजवंशी समाज उत्थान केन्द्रीय समितिका अध्यक्ष भुवनेश्वर मण्डल, आदिवासी जनजातिमा सचिव सदस्य कमलप्रसाद राजवंशी, राजवंशी समाज उत्थान केन्द्रीय उपाध्यक्ष प्रदीप विश्वाश राजवंशी, सदस्य सिधु राजवंशी लगायतले शुभकामना मन्तव्य राखेको बृहत भेलाका सहसंयोजक राजेशकुमार राजवंशीले बताए ।