विराटनगर–८ बलुवाहीमा मलामी विश्रामघर निर्माण

विराटनगर । विराटनगर–८ स्थित बलुवाहीमा मलामी विश्रामघर निर्माण हुने भएको छ । २० फिट चौडाइ र ४० फिट लम्बाइको विश्राम घर एक महिनाभित्र निर्माण सम्पन्न गर्ने लक्ष्य राखिएको वडाध्यक्ष राम पोखरेलले जानकारी दिए । 

महानगरको ३ र वडाको ५ लाखसहित कुल ८ लाख रूपैयाँमा निर्माण हुने विश्रामघरको छानो जस्तापाताको हुनेछ । 

महानगरपालिका र वडाको आर्थिक स्रोतबाट निर्माण हुन लागेको मलामी विश्रामघरको मेयर नागेश कोइरालाले शिलान्यास र उपमेयर शिल्पा निराला कार्कीले भूमिपूजन गरे । 

विशेष गरी विराटनगर–८ का बलुवाही, अमरटोल,  विश्वकर्मा चोक, विराटनगर–१०, १४ र जहदा गाउँपालिकाका केही वडाबाट बलुवाहीस्थित घाटमा अन्त्येष्टिका लागि ल्याइने गरिएको छ ।

यसरी अन्त्येष्टिमा आउने मलामीलाई बस्न सहज होस् भन्ने उद्देश्यले विश्रामघर निर्माण गर्न लागिएको वडाध्यक्ष पोखरेलको भनाइ छ ।