वादविवाद प्रतियोगिताको तयारी

विराटनगर । चुडाकवि स्मृति प्रतिष्ठान बुढीगंगा मोरङले जिल्लास्तरीय वादविवाद प्रतियोगिता गर्ने भएको छ । प्रतिष्ठानले बिहीबार विराटनगरमा पत्रकार सम्मेलन गरी माघ १६ गते पूर्व राष्ट्रपति विद्यादेवी भण्डारीको प्रमुख आतिथ्यतामा बुढीगंगास्थित स्मृति बोर्डिङ स्कुलमा प्रतियोगिता हुने जानकारी दिएको हो ।

‘भौतिक पूर्वाधार विकास कि सामाजिक पूर्वाधार विकास’ शीर्षकको वादविवाद प्रतियोगितामा उत्कृष्ट पक्ष र विपक्ष दुवै समूहलाई नगदसहित, शिल्ड र प्रमाणपत्र प्रदान गरिने प्रतिष्ठानकी महासचिव रिता न्यौपानेले जानकारी दिइन् । 

प्रतियोगितामा सामुदायिक र संस्थागत गरी ४८ विद्यालयले सहभागी जनाउन दर्ता भइसकेको र बाँकी विद्यालयहरू गरी ५० बढी विद्यालय सहभागी हुने उनले जानकारी दिइन् ।

‘प्रथम पुरस्कार २० हजार, द्वितीय पुरस्कार १५ हजार र तृतीय पुरस्कार ११ हजार पक्ष र विपक्ष गरी ६ जनालाई नै नगदसहित पुरस्कार प्रदान  गरिने उनले बताइन् । प्रतिष्ठानले वादविवाद प्रतियोगितासँगै, बुढीगंगा गाउँपालिकामा कार्यरत ३८ जना महिला स्वयंसेविकाहरूलाई समेत सम्मान गर्ने उपाध्यक्ष मणिराम न्यौपानेले बताए ।