एमाले मोरङको नयाँ नेतृत्वको ध्यान पालिका अधिवेशनमा

विराटनगर । संस्थापन समूहका नाममा पार्टी नेतृत्वबाट भएको उत्पीडनको जवाफ जिल्ला अधिवेशनबाट दिइसकेको एमाले मोरङको वर्तमान नेतृत्वको ध्यान अहिले पालिका अधिवेशनमा केन्द्रित बनेको छ । 

मोरङका १७ वटा पालिका मध्ये १२ वटामा पालिका अधिवेशनको मिति तय भइसकेको छ । अधिवेशन टुंगिएका १२ वटा पालिकाहरू मध्ये बिहीबार सुनवर्षी नगरपालिकाबाट अधिवेशनको थालनी भएको एमाले मोरङका सचिव सोमराज थापाले जानकारी दिए ।

‘१२ वटाको अधिवेशन हुने मिति टुंगो लागिसकेको छ, आज सुनवर्षी नगरपालिकाबाट अधिवेशन सुरू भयो’ थापाले भने, ‘जिल्ला अधिवेशनमा भएको ढिलाईसँगै लामो समयदेखि पालिका अधिवेशन हुन सकेको थिएन, अब हाम्रो नेतृत्व पालिका अधिवेशन सम्पन्न गर्न केन्द्रित बनेको छ, शनिबार मात्रै बुढीगंगा, कटहरी, रतुवामाईसहित चारवटा पालिकाको अधिवेशन छ ।’

एमाले मोरङको शक्ति सन्तुलनमा उलटपुलट हुने गरी प्रभाव पारेको विराटनगर महानगर कमिटीको दोस्रो अधिवेशन समेत आगामी २०८२ बैशाख २ र ३ गते विराटनगरमा हुँदैछ । 

अधिवेशनको तयारीका लागि महानगर संगठन कमिटीका अध्यक्ष रोहित कोइरालाको अध्यक्षतामा बिहीबार सचिवालय बैठक बसेको छ । 

महानगर अधिवेशनमा एमाले मोरङभित्रको शक्ति संघर्षमा सक्रिय रहेका नेताहरूको प्रभाव अझ उजागर हुने एमाले कार्यकर्ताहरूको बुझाइ छ । सचिवालय बैठकले महानगर अधिवेशन सम्पन्न गर्न विभिन्न ९ वटा समिति गठन गरेको जनाइएको छ ।

महानगर अधिवेशनका लागि चैत्र २८ मा एकैदिन प्रतिनिधि चयन गर्ने निर्णय गरेको महानगर कमिटीका सचिव बलराम गिरीले बताए । जनसंगठनहरूबाट भने चैत २९ मा प्रतिनिधि चयन हुने उनले बताए । 

अधिवेशन सम्पन्न गर्न अध्यक्ष रोहित कोइरालाको संयोजकत्वमा २५१ सदस्यीय मूल व्यवस्थापन समिति गठन गरिएको गिरीले जानकारी दिए ।

सचिव गिरीको संयोजकत्वमा प्रतिनिधि व्यवस्थापन उपसमिति, प्रवक्ता राम पोखरेलको संयोजकत्वमा प्रचार–प्रसार उपसमिति गठन भएको छ । आर्थिक उपसमितिको संयोजकमा मनोजबिक्रम साह र सह–संयोजकमा सीएम श्रेष्ठ रहेका छन् । त्यस्तै प्रकाश पोखरेलको संयोजकत्वमा स्वयंसेवक उपसमिति गठन भएको जनाइएको छ । 

अध्यक्ष कोइरालाले भूगोलबाट हरेक १५ जना संगठित सदस्य बराबर एक जना चयन हुने गरी प्रतिनिधि चयन हुने बताए । यस्तै हरेक तीन जना प्रतिनिधि बराबर एक जना महिला अनिवार्य चयन हुने उनले जानकारी दिए । 

महानगर अधिवेशनमा चयन हुने कूल प्रतिनिधिमा २० प्रतिशत युवाको प्रतिनिधित्व अनिवार्य गरिएको जनाइएको छ । 

बैठकमा नेकपा एमाले कोशी प्रदेश कमिटी सदस्य तथा महानगरका इन्चार्ज पर्शुराम बस्नेतले एमालेभित्र कुनै पनि गुट नरहेको बताए । गुट नभएका कारण सर्वसम्मत रूपमा नेतृत्व चयन गर्न पार्टीका सबै नेताहरूले भूमिका निर्वाह गर्ने उनले बताए । 

एमाले मोरङका सचिव थापाले एमालेजस्तो अनुशासित पार्टी अरू नभएको दाबी गर्दै महानगरको दोस्रो अधिवेशनले अभूतपूर्व एकताको सन्देश प्रवाह गर्ने बताए । 

एमाले नेतृ एवं विराटनगर महानगरपालिकाकी उप–प्रमुख शिल्पा निराला कार्कीले पार्टीभित्र व्यक्तिलाई केन्द्रमा राखेर राजनीति भइरहेको गुनासो पोख्दै त्यसले पार्टीलाई भने क्षति पुग्ने बताइन् । 

विनोद ढकाल नेतृत्वको संस्थापन इतर समूहमा रहँदै आएकी उप–प्रमुख कार्कीले १०औं जिल्ला अधिवेशनमा संस्थापन समूहबाट उप–सचिवमा उठेर झीनो मतले पराजित भएकी थिइन् । उनले त्यसको पीडा बिहीबार महानगर कमिटीको सचिवालय बैठकमा पनि पोखेकी हुन् । 

पार्टीका केही नेताहरूले नै चिया पसल र मिडियामा पार्टीबाट निर्वाचित जनप्रतिनिधिको आलोचना मात्रै गरेको गुनासो पोखिन् । 

अबको महानगर नेतृत्व सबैको अभिभावकत्व ग्रहण गर्न सक्ने क्षमतावान् हुनु पर्नेमा उनले जोड दिइन् ।