एमाले मोरङ १० औं अधिवेशन : प्रतिनिधि छान्न दुई वटा मापदण्ड प्रस्ताव

विराटनगर । नेकपा एमाले मोरङको १०औं जिल्ला अधिवेशनमा सहभागी हुने प्रतिनिधि एकैदिन छान्न फागुन १० गतेको मिति तोकिइसकेको छ । तर प्रतिनिधि छँन्दा कुन मापदण्ड अपनाउने भन्ने बिषयमा अझै पनि टुंगो लाग्न सकेको छैन ।

एमाले स्रोतका अनुसार प्रतिनिधि छनोटका लागि पार्टी नेतृत्वमा हाल दुई खालका मोडल प्रस्ताव गरिएका छन् । मोरङका १७ पालिकाका सबै १५९ वटा वडामा एकैपटक प्रतिनिधि छान्ने एमालेको तयारी छ । 

त्यसका लागि पहिलो मोडेलका रूपमा ३० जना संगठित सदस्य बराबर १ पुरूष र २० जना महिला बराबर १ महिला प्रतिनिधि छनोट गर्ने प्रस्ताव गरिएको छ । त्यसैगरी दोस्रो मोडेलमा एक सय जना प्रतिनिधि बराबर एक महिलासहित ३ जना प्रतिनिधि छान्ने प्रस्ताव गरिएको जनाइएको छ ।

राजनीतिक केन्द्र रहेको मोरङमा लामो समयदेखि पार्टीको जिल्ला अधिवेशन हुन नसक्दा केन्द्रीय समितिले नै निर्देशानत्मक रूपमा जिल्ला अधिवेशन गर्न दवाव बढाएपछि फागुन १७ देखि १९ सम्म अधिवेशनको मिति तोकिएको छ ।

उक्त अधिवेशनबाट अध्यक्षमा निर्वाचित हुनका लागि अहिलेसम्म आठजनाले प्रत्यक्ष र अप्रत्यक्ष रूपमा आफ्नो आकांक्षा व्यक्त गरिसकेका छन् । तर उनीहरूले आकांक्षा गरे पनि अधिवेशनमा सहभागी हुने मतदाता भने कसरी छनोट हुने भन्ने अन्योल कायमै छ ।

‘दुईवटा मोडल प्रस्ताव गरिएका छन्, अहिले छलफलकै चरणमा छ’ एमालेका एक नेताले भने, ‘पहिलो मोडेलमा सवैको सहमति खोज्ने प्रयास हुँदाहुँदै नेतृत्व तहबाटै दोस्रो मोडल सार्वजनिक भएको भनिएको छ, फागुन १० मा प्रतिनिधि छँन्नैपर्ने बाध्यता भएकोले चाँडो टुंगिएला ।’

नवौं अधिवेशनबाट सर्वसम्मत नेतृत्व चयन गरेको एमाले मोरङभित्र यसपटक भने नेतृत्व हत्याउन ठुलै घम्साघम्सी हुने कार्यकर्ताहरूको भनाइ छ ।

अध्यक्ष पदका लागि वर्तमान संगठन कमिटीका अध्यक्ष बाबुराम कार्की, जिल्ला समन्वय समिति मोरङका प्रमुख रहेका अजम्बर राई, कोशी प्रदेशसभाका पूर्व सदस्य राजकुमार ओझा, एमाले विराटनगर महानगर कमिटीका पूर्वअध्यक्ष सागर थापा, अघिल्लो जिल्ला कमिटीका सचिव रहेका रूपेश खतिवडा, बेलबारीका एमाले नेता इरान राई, नेपाल खेलकुद महासंघका केन्द्रीय अध्यक्ष पर्शुराम बस्नेत र एमाले नेता महेश भट्टराईको नाम चर्चामा छ ।