Biratnagar, Morang, Nepal
२१ चैत २०८१, बिहिवार
+977 21 450305, 515728, 578305
शिक्षा

सीएको परीक्षामा मेरिल्याण्ड एकेडेमीको उत्कृष्ट नतिजा

उद्‌घोष सम्वाददाता
६ फागुन २०८१, मङ्गलवार

विराटनगर । नेपाल चार्टर्ड एकाउन्टेन्टस् संस्थाले गत मंसिरमा लिएको सबै तहको परीक्षाको परीक्षाफलमा मेरिल्याण्ड करियर एकेडेमी विराटनगरले उत्कृष्ट नतिजा ल्याएको छ । शुक्रबार  प्रकाशित परीक्षाफलमा विराटनगर–२ स्थित एकेडेमीमा अध्यनरत विद्यार्थीहरुले उत्कृष्ट नतिजा ल्याउन सफल भएका हुन् ।

सीएको पहिलो तह (क्याप वान) तर्फ ६ जना विशिष्ठ श्रेणीसहित ७१ प्रतिशत विद्यार्थी उत्तीर्ण भएका छन् । 

दोस्रो तह (क्याप टु) मा १४ विद्यार्थीले दुबै समूह उत्तीर्ण गरि फाइनल  तह अध्ययन गर्न योग्य भएका छन् । यसैगरी १३ जना विद्यार्थीले दोस्रो तहको दुई समूह मध्ये एउटा समूह उत्तीर्ण गर्न सफल भएका छन् । 

तेस्रो तथा अन्तिम तह (क्याप थ्री) मा अंकित रायले उत्तीर्ण गरी सीए उपाधि हासिल गरेका छन् । हालसम्म सो संस्थाबाट १२ जनाले सीएको उपाधि हासिल गरिसकेको संस्थाका अध्यक्ष डा मोहनकुमार सुवेदीले बताए ।

आइतबार उत्तीर्ण विद्यार्थीहरुलाई संस्थाले एक कार्यक्रम गरी सम्मानित गरेको छ । सो कार्यक्रममा प्राडा प्रमोदकुमार झा, पूवि पीएचडी तथा एमफिल कार्यक्रमका निर्देशक प्राडा जीवनकुमार ढकाल, सीए मनोज अधिकारी र सीए युवराज उप्रेतीले उत्तीर्ण विद्यार्थीहरुलाई शुभकामना तथा हौसला दिएका थिए ।

कोशी प्रदेशमा सीए अध्यापन गराउने सो संस्थाले छोटो समयमानै सीए कोर्षको पठनपाठनलाई राम्रो उचाइमा लैजान सफल भएको र अव वास्तवमा नै सीए अध्ययनको लागि काठमाडौं अथवा भारत जानुपर्ने बाध्यताको पूर्णरुपमा अन्त्य भएको एकेडेमीका निर्देशक भेषराज पोखरेलले बताए । 

एकेडेमीका निर्देशक सीए किञ्जल पोखरेलका अनुसार हाल संस्थामा नियमित रुपमा १० जना चार्टर्ड एकाउन्टेन्टहरूसहित अन्य विषयगत दक्ष शिक्षकहरुबाट अध्यापन हुने गरेको छ ।

हाल मेरिल्याण्ड करियर एकेडेमीमा पहिलो तहमा ७५ जना, दोस्रो तहमा ४५ जना र फाइनल तहमा ३५ जना विद्यार्थी अध्ययनरत छन् ।

View : 111

Copyright © 2023 -2025. Udghosh Daily. All Rights Reserved