साना तथा मझौला उद्योग प्रवर्द्धन गर्न समझदारी

विराटनगर । कोशी प्रदेशमा साना तथा मझौला उद्योगहरूको प्रवद्र्धनका लागि द्विपक्षीय समझदारी पत्रमा हस्ताक्षर सम्पन्न भएको छ । नेपाल उद्योग वाणिज्य महासंघ कोशी प्रदेशका अध्यक्ष राजेन्द्र राउत र उदय परियोजनाका टिम लिडर अरुण राणाले समझदारी पत्रमा हस्ताक्षर गरेका हुन् ।

समझदारी पत्रमा हस्ताक्षर गर्दै नेपाल उद्योग वाणिज्य महासंघ कोशी प्रदेशका अध्यक्ष राजेन्द्र राउतले मुलुकको आर्थिक एवं सामाजिक विकासमा लघु, घरेलु तथा साना उद्योगको महत्वपूर्ण योगदान रहेको बताए । 

उनले साना तथा मझौला उद्योगले नेपालको कुल ग्राहस्थ उत्पादनमा करीव २२ प्रतिशत योगदान गरेर १७ लाख मानिसहरूलाई रोजगारी प्रदान गरेको दाबी गरे । तर लघु, साना तथा मझौला उद्योगको प्रवद्र्धन अपेक्षित रूपमा हुन नसकिरहेको गुनासो गरे ।

महासंघले व्यवसायिक विकास सेवा सुरुवात गरेको उल्लेख गर्दै उनले समझदारीपछि व्यवसायिक विकास सेवाको प्रवद्र्धन क्षमता विकास, सञ्जाल विस्तार, समन्वय तथा साना तथा मझौला उद्योगको दिगो विकास र व्यवसायिक अनुकूल वातावरण निर्माणको लागि योगदान पुग्ने बताए ।

परियोजनाका टिम लिडर राणाले समझदारीमा हस्ताक्षर भएपछि कोशी प्रदेशमा सक्रिय साना तथा मझौला उद्योगलाई लक्षित गरी व्यवसाय विकास परामर्शदाता परिचालन गर्ने साझेदारीको रुपरेखा प्रस्तुत गर्ने बताए ।

कोशी प्रदेशका साना तथा मझौला उद्योग प्रवद्र्धनमा महासंघ कोशीले विभिन्न कार्यक्रमहरु सञ्चालन गर्दै आइरहेको जनाइएको छ । 

कोशी प्रदेशमा रहेका सबै जिल्ला तथा नगर उद्योग वाणिज्य संघ, वस्तुगत संघ तथा व्यावसायिक संघसंस्थाको सहकार्यमा अघि बढाउने जनाइएको छ । 

डाई उदय परियोजना, स्विस सरकार विकास सहयोग र अर्थ मन्त्रालयद्वारा संयुक्त रुपमा वित्तपोषण गरिएको तथा कोशी प्रदेश आर्थिक मामिला तथा योजना मन्त्रालय एवं डाई ग्लोबल युके लिमिटेडले यो परियोजना कार्यन्वयन गर्ने जनाएको छ ।