गोली प्रहार गरी दुई कारोबारी पक्राउ

विराटनगर । धरान–१७ बाट लागूऔषध गाँजा बोकेको कार प्रहरीले नियन्त्रणमा लिएको छ । बुधबार बिहान ५ बजे लागूऔषध ओसारपसार भइरहेको भन्ने विशेष सूचनाको आधारमा इलाका प्रहरी कार्यालय धरानबाट खटिएको प्रहरी टोलीले गाँजा बोकेको बा.९च १७६८ नम्बरको कार नियन्त्रणमा लिएको हो ।

धरान–१७ स्थित विष्णुपादुका जाने सर्दुखोलाको पुलनजिक चालक नभएको अवस्थामा रोकी राखेको बा९च १७६८ नम्बरको कारलाई शंका लागी चेकजाँच गर्दा कारभित्र १०१ किलोग्राम गाँजा बरामद गरिएको प्रहरीले जनाएको छ । 

गाँजा बरामद भएसँगै उक्त कार समेतलाई प्रहरीले नियन्त्रणमा लिई ओसारपसारमा संलग्न व्यक्तिको खोजतलास तथा अन्य थप अनुसन्धान गरिरहेको जनाइएको छ ।

यसैगरी झापाको कनकाई नगरपालिका–४ बाट लागूऔषध ओसारपसारमा संलग्न दुई जनालाई प्रहरीले गोली प्रहार गरी नियन्त्रणमा लिएको छ । मंगलबार राती लागूऔषध ओसारपसार भइरहेको भन्ने विशेष सूचनाको आधारमा लागूऔषध नियन्त्रण ब्युरो कांकरभिट्टा र इलाका प्रहरी कार्यालय सुरुङ्गाबाट खटिएको प्रहरी टोलीले दुई जनालाई नियन्त्रणमा लिएको हो । 

कनकाई नगरपालिका–४ कुमरखोद–सुरुङगा भित्री सडक खण्डमा चेकजाँचको क्रममा दुई जना सवार भारतीय नम्बरको मोटरसाइकललाई शंका लागी रोक्न खोज्दा नरोकी भगाए पछि प्रहरीले गोली प्रहार गरी नियन्त्रणमा लिएको हो । 

खुट्टामा गोली लागी घाइते भएका मोटरसाइकल चालक भारत बिहार डिगल बैंकका २८ वर्षीय अन्जर आलमको प्रादेशिक अस्पताल भद्रपुरमा प्रहरीको निगरानीमा उपचार भइरहेको छ । 

बरामद भएको ३० ग्राम ६९० मिलिग्राम ब्राउनसुगर र मोटरसाइकल पछाडि सवार उनका भाइ १९ वर्षीय युसुब आलमलाई प्रहरीले नियन्त्रणमा लिएको छ । 

ब्राउनसुगर सहित पक्राउ परेका उनीहरूको इलाका प्रहरी कार्यालय अनारमनीबाट थप अनुसन्धान तथा कानुनी कारवाही भइरहेको जनाइएको छ ।