ताप्लेजुङको फुङ्लिङ बजार र काफ्लेपाटीमा अनिश्चितकालीन निषेधाज्ञा

विराटनगर । पाथिभरामा निर्माण सुरु भएको केवलकारको विरोध गर्दै आएको ‘नो केलकार समूह’ ले शनिबार राती मसाल जुलुसका क्रममा व्यक्तिका घरमा आगजनी प्रयास गरेका छन् । 

मसाल जुलुसलाई रोक्ने क्रममा प्रहरी र आन्दोलनकारीबीच झडप हुँदा ताप्लेजुङ सदरमुकाम फुङ्लिङ बजार रातभर तनावग्रस्त बनेको छ । 

स्थानीय प्रशासनले सम्भावित घटना रोक्नका लागि फुङलिङ बजार क्षेत्र र केवलकार निर्माण क्षेत्र रहेको काफ्लेपाटीमा आइतबार विहान ५ बजेदेखि अनिश्चितकालिन निषेधाज्ञा आदेश जारी गरेको छ । 

ताप्लेजुङका प्रमुख जिल्ला अधिकारी नेत्र प्रसाद शर्माका अनुसार निषेधाज्ञा क्षेत्रमा पाँच जना भन्दा बढि मानिस भेला भई सभा, जुलुस प्रदर्शन र घेराउ जस्ता कार्य गर्न पाइने छैन ।

आन्दोलनकारीले राँके जुलुस प्रदर्शन गर्ने क्रममा प्रहरीले रोकेपछि वीरेन्द्र चोकमा झडप भएको जनाइएको छ ।

शनिबार राती भएको झडपमा केही सुरक्षाकर्मी र आन्दोलनकारी घाइते भएका छन् । प्रजिअ शर्माका अनुसार आन्दोलनकारीले बोतलमा प्रज्वलनशिल पदार्थ भरेर आगो लगाउँदै व्यक्तिका घरमा हानेका थिए ।

पाथिभरामा केबलकार निर्माणको विरोध र समर्थनमा प्रदर्शन हुने गरेका छन् । विरोधमा उत्रिएको समुह र सुरक्षाकर्मीको एकसातामा तीन पटक झडप भइसकेको छ । सुरक्षाकर्मीसहित आन्दोलनकारी घाइते भएका छन् । 

केवलकारको विरोधमा रहेको समुहले आइतबार फुङलिङ नगरपालिका घेराउको कार्यक्रम राखेको जनाइएको छ । घेराउका क्रममा हुनसक्ने सम्भावित झडपलाई समेत मध्यनजर गर्दै जिल्ला सुरक्षा समितिको बैठकबाट स्थानीय प्रशासनले निषेधाज्ञा आदेश जारी गरेको हो ।