विराट एक्स्पोमा जेनेस सोलुशन सहभागी हुँदै

विराटनगर । माघ १२ गतेदेखि २० गतेसम्म विराटनगरमा हुन लागेको ‘विराट एक्स्पो २०२५’ मा बेलायतमा मुख्यालय रहेको सूचना प्रविधि सम्बन्धी कम्पनी जेनेस सोलुशन पनि सहभागी हुने भएको छ ।

उक्त एक्स्पोमा जेनेस सलुशनका प्रमुख कार्यकारी अधिकृत अञ्जनी फुयालले कोशी प्रदेशको आर्थिक तथा प्राविधिक समृद्धिको लागि डिजिटल कोशी : परिकल्पनादेखि यथार्थसम्म विषयमा प्रस्तुति दिने छन् ।

उनले कोशी प्रदेशमा डिजिटल नवप्रवर्तनमा आफनो लामो अनुभवको आधारमा कोशी प्रदेशमा प्रशासन संयन्त्र तथा औद्योगिक क्षेत्रमा डिजिटल प्रविधिको रुपान्तरणकारी भूमिकाको बारेमा आफनो दृष्टिकोण प्रस्तुत गर्ने बताएका छन ।

उनले डिजिटल रुपान्तरणमा जादा व्यहोर्नु पर्ने चुनौती तथा अवसरहरु र सो परिकल्पनालाई यथार्थमा बदल्न लागू गर्न सकिने रणनीति तथा साझेदारी मोडेलहरुका बारेमा पनि प्रस्तुति दिने बताइएको छ ।

उद्योग संगठन मोरङद्वारा ‘डिजिटल कोशी : ब्रिजिङ इनोभेशन एण्ड इन्भेष्टमेन्ट’ मूल नाराका साथ उक्त एक्स्पो डिग्री क्याम्पस विराटनगरमा आयोजना हुँदैछ ।

कोशी प्रदेशका १४ जिल्लामा झन्डै ५० लाख जनता बसोबास गर्दछन् ।

विराटनगर, इटहरी, धरान, विर्तामोड तथा दमक कोशी प्रदेशका प्रमुख शहरी नगर क्षेत्रहरु हुन् ।  

नेपालकै पुरानो औद्योगिक क्षेत्र रहेको कोशी प्रदेशलाई  सूचना तथा प्रविधिमा आधारित ज्ञान अर्थतन्त्र तर्फ डोहोरयाउने उद्देश्यले उक्त एक्स्पो आयोजना गरिएको आयोजकले जनाएका छन् ।

जेनेस सलुशन सूचना प्रविधि सम्बन्धी गुणात्मक सेवा प्रदायक परामर्शदाता कम्पनी हो । 

युकेमा मुख्यालय रहेको जेनेस सलुशनले व्यवसायहरुलाई सूचना प्रविधि सम्बन्धी परामर्श दिनुका साथै रुपान्तरणकारी ‘डिजिटल इकोसिस्टम’ तयार गरेर तिनका प्राविधिक लक्ष्य प्राप्त गर्न पनि सघाउदै आएको छ । 

जेनेस सलुशनको नेपाल, बंगलादेश, फिनल्याण्ड, अमेरिका, नाइजेरिया लगायत १० वटा मुलुकहरुमा कार्यालय छन् ।