गोल्डकप उद्घाटन गर्न भन्दै कालाबन्जर हिंडेका भीम रावल त्यत्तिकै फर्किए

सुनसरी । नेकपा एमालेबाट पार्टीको साधारण सदस्य समेत नरहने गरी कारवाहीमा परेका नेता भीम रावलले उद्घाटन गर्नेे भनिएको एउटा फुटबल प्रतियोगिता स्थगित हुँदा उनी त्यतिकै फर्किएका छन् ।

सुनसरीको बराहक्षेत्र नगरपालिका–५ कालाबञ्जरमा शनिबारबाट सुरु हुने भनिएको तेस्रो संस्करणको अन्तर्राष्ट्रिय आमन्त्रण भरौल भेट्रान गोल्डकप फुटबल प्रतियोगिता स्थगित गरेर दुई दिनपछि सारिएको हो । प्रतियोगिताको उद्घाटनका लागि प्रमुख अतिथि भनेर बोलाइएका रावल भने त्यत्तिकै फर्किएका छन् । 

आयोजक भरौल भेट्रान क्लबले प्राविधिक कारण देखाउँदै गोल्डकपको उद्घाटन कार्यक्रमलाई गएराती नै सारेको थियो । क्लबले मैदान व्यवस्थापनको काम नसकिएकाले उद्घाटन सरेको बताएपनि रावल उक्त कार्यक्रममा सहभागी हुन भन्दै पुगेका थिए ।

गोल्डकपको उद्घाटन आयोजकले सारेपछि रावल सोही वडामा रहेको चतरा बचत तथा ऋण सहकारी संस्थाको बार्षिक साधारणसभामा सहभागी हुने कार्यक्रम बनेको थियो । तर उक्त कार्यक्रममा पनि रावल सहभागी भएनन् । 

उनी त्यहीँको एक होटलमा केही मानिसहरूसँग भेटघाट गरी फर्किएको सुरक्षा श्रोतले जनाएको छ । 

एक सुरक्षा अधिकारीले भने– ‘अन्तर्राष्ट्रिय आमन्त्रण भरौल भेटान गोल्डकप फुटबल प्रतियोगिता उद्घाटन गर्न रावल आउनु हुने हिजै दिउँसो जानकारी आएको थियो, सोही अनुसार हामीले सुरक्षा व्यवस्था मिलाएका थियौं, तर कार्यक्रम नहुने जानकारी आयो ।’

शनिबार विहान रावललाई स्वागत गर्न एकीकृत समाजवादीका केन्द्रीय सदस्य ओसिम आलम लगायतका केही नेता तथा कार्यकर्ता र राजावादी भनेर चिनिएका व्यक्तिहरू विराटनगर विमानस्थलमा पुगेका थिए ।

स्वागतका लागि पुगेका राजावादीहरूले भने ‘जय देश, जय नरेश’ भन्दै राजसंस्थाको पक्षमा नारा लगाएका थिए । त्यसको नेतृत्व राजा फकाउनुपर्छ भन्दै अभियान चलाइरहने सतिस पोखरेल लगायतले गरेका थिए ।