ओलीको निर्देशन लत्याउँदै बन्यो दुई प्यानल

विराटनगर । नेकपा एमालेका अध्यक्षसमेत रहेका प्रधानमन्त्री केपी शर्मा ओलीले मोरङको एमाले अधिवेशनलाई प्रष्ट सन्देश पठाएका थिए । ओलीको भनाइ थियो ‘गुटबन्दी बढ्ने गरी प्यानल नबनाउनू, सहमतिमा नेतृत्व चयन गर्नू ।’ 

शनिबार अधिवेशन उद्घाटन गर्न आएका उपाध्यक्ष रामबहादुर थापा बादलले ‘अध्यक्ष कमरेडको सन्देश’ भन्दै यही कुरा सुनाएका थिए । 

थापा मात्रै होइन, अरु केन्द्रीय नेताहरूले पनि उही कुरा दोहोर्याएका थिए । यद्यपि पार्टीको मोरङ अधिवेशनमा ओलीसहितका केन्द्रीय नेताहरूको निर्देशन अवज्ञा भएको छ ।

ओली पक्षकै नेताहरूले आफ्नै अडानविपरीत प्यानल खडा गरेका छन् । संस्थापन पक्षले सहमतिको प्रयास नगरी सबै पदमा प्यानल बनाएपछि इतर पक्षले पनि त्यसै गरेको छ । 

संस्थापन पक्ष राजकुमार ओझा नेतृत्वमा चुनावी मैदानमा होमिदा इतर पक्ष अजम्बर राईको अगुवाइमा प्रतिष्पर्धामा ओर्लिएको छ । 

अध्यक्षका दुई उम्मेदवारमध्ये प्रदेशका पूर्वसांसद ओझालाई कोशी प्रदेशबाट प्रतिनिधित्व गर्ने बहुसंख्यक स्थायी कमिटी सदस्यको साथ छ । 

अध्यक्षमै उम्मेदवार बनेका जिसस मोरङका प्रमुख अजम्बर राईलाई नेता विनोद ढकालको समर्थन छ । 

ओझाको टिमबाट उपाध्यक्षमा शान्ति लिम्बू, सचिवमा रविन थापा, उपसचिवमा इर्जालाल राजवंशी र शिल्पा निराला कार्कीले उम्मेदवारी दिएका छन् । कार्की विराटनगरकी उपमेयर हुन् । 

त्यस्तै, ढकाल समूहबाट अध्यक्ष अजम्बर राई, उपाध्यक्षमा सागर थापा, सचिवमा सोमराज थापा, उपसचिवमा सन्तोष वान्तवा र उषा झाले उम्मेदवारी दिएका छन् ।  उषा झा जिसस मोरङकी उपप्रमुख हुन् । एमाले मोरङ जिल्ला कमिटी पदाधिकारीसहित  १६५ सदस्यीय हुनेछ । 

केन्द्रका नेताहरूको निर्देशनविपरीत फरक प्यानल बनाएका दुवै समूहले सहमतिका लागि भने खुला रहेको दाबी गरिरहेका छन् । 

‘हामी सहमतिका लागि लचिलो र खुला थियौं’, विनोद ढकाल पक्षका नेता सागर थापाले भने ‘तर, सहमतिमा जाने रहर केही नेताहरूले देखाएनन् । प्यानल बनाएपछि अर्को पक्षले पनि प्यानल बनाउनुको विकल्प रहेन ।’ 

संस्थापन पक्षले भने अर्को पक्षले चुनाव चाहेकाले यस्तो अवस्था आएको दाबी गरेको छ । 

‘साथीहरूलाई सहमतिका लागि आग्रह गरिएको हो’, संस्थापनबाट अध्यक्षको उम्मेदवार बनेका राजकुमार ओझाले भने ‘अहिले पनि केही बिग्रेको छैन, सहमतिको समय छ ।’ 

औपचारिक रुपमा दुवै पक्षले सहमतिका लागि लचिलो र खुला रहेको दाबी गरे पनि मोरङ एमालेमा सहमतिको सम्भावना टरेको कार्यकर्ताहरू बताउँछन् । 

‘यहाँ रहेका मुख्य नेताहरूको एउटा समूह छ, अर्कोतिर विनोद ढकालको अर्को समूह छ’ जिल्ला प्रतिनिधि रहेका एक कार्यकर्ताले भने ‘दुवै पक्ष चुनाव जित्ने आत्मविश्वासमा देखिन्छन् । फेरि कसको नाममा सहमति गर्ने भन्ने विषय जटिल छ । अब निर्वाचन नै निश्चित भएको देखिन्छ ।’ 

ती कार्यकर्ताले भने जस्तै मोरङ एमालेको नेतृत्वमा हुने प्रतिष्पर्धा दुवै पक्षका लागि ठूलो प्रतिष्ठाको लडाइँ बन्न पुगेको छ । रोचक के छ भने कुनै बेला केपी शर्मा ओलीको विपक्षमा उभिएका ओझालाई यतिबेला ओली पक्षका सबैजसो नेताले च्यापेका छन् ।

पार्टीका उपाध्यक्ष गुरु बरालदेखि स्थायी कमिटी सदस्यहरू शेरधन राई, भानुभक्त ढकाल, हिक्मत कार्की, केन्द्रीय सदस्य जीवन घिमिरे, कोशी प्रदेश अध्यक्ष घनश्याम खतिवडा लगायतका ओली पक्षका नेताहरू जसरी पनि ओझालाई अध्यक्ष बनाउने कसरतमा छन् । 

एकातिर केन्द्रीय नेताहरूको जम्बो टिम ओझाका पक्षमा उभिंदा कुनै बेला ओलीका विश्वास पात्र मानिने विनोद ढकाल भने एक्लै अजम्बर राईको पक्षमा छन् । ओली पक्षका नेताहरू ढकालको विपक्षमा उभिएका छन् । 

यस हिसाबले मोरङमा हुने चुनावी प्रतिष्पर्धा ओलीको सिंगो टिम भर्सेस विनोद ढकाल एक्लैको अवस्थामा पुगेको छ । पार्टी सत्ता र राज्यसत्ता सम्हालिरहेको समूहविरुद्ध ढकाल पक्ष मैदानमा रहेको कार्यकर्ताहरू बताउँछन् । 

‘संस्थापन पक्षले प्रतिनिधिहरूलाई अहिले नै विभिन्न पदहरू धमाधम बाँडिरहेको छ’, एक जना प्रतिनिधिले भने ‘वडा सदस्यदेखि प्रदेश सांसदसम्मको पद बाँडेर भए पनि मत फकाउन नेताहरू लागिरहेका छन् ।’

उनको भनाइले पनि संस्थापन पक्षका नेताहरू ढकाल समूहसँग त्रस्त देखिन्छन् भने ढकाल समूह पार्टी सत्ता र राज्यसत्ताको दुरुपयोग हुने भयले तर्सिएको छ । 

अहिले इतर समूहका नेतृत्व गरिरहेका विनोद ढकाल पूर्वको पार्टी संगठनमा माधव नेपालको जगजगी हुँदा ओली पक्षका एक मात्रै पिल्लर मानिन्थे । समयक्रममा उनै ढकाल यतिबेला ओली र उनको टिमका नेताहरूसँग एक्लै भिड्ने विन्दुमा आइपुगेका छन् ।

यसको सुरुवात २०८० असोजमा भएको प्रदेश अधिवेशनबाट भएको थियो । त्यसबेला ढकाल केन्द्रीय सदस्य थिए । तर, उनले प्रदेश अध्यक्ष दाबी गरे । ओली टिममा रहेका कोशीका नेताहरू गुरु बराल, शेरधन राई, भानुभक्त ढकाल, हिक्मत कार्की लगायतले घनश्याम खतिवडालाई अघि सारिसकेका थिए ।

२०७४ मा शेरधन राई मुख्यमन्त्री बनेपछि एकै टिममा भएर पनि ढकालको राई र कार्कीसँग सम्बन्ध चिसिएको थियो । सोही कारण नेताहरूले कुनै बेला माधव नेपाल निकट रहेका खतिवडालाई च्यापेका थिए । 

त्यही बेलादेखि ओली र उनको टिमसँग एक्लै भिडिरहेका ढकाल जिल्ला अधिवेशनमा आइपुग्दा पनि भिड्ने योजनासहित टिम लिएर मैदानमा छन् । भन्नलाई त ढकाल आफू केपी ओली टिममै रहेको बताइरहेका छन् । 

‘अध्यक्ष कमरेडको नाम लिएर तलका साथीहरू मनपरी गर्न खोजिरहेको’ भन्दै उनले केपी शर्मा ओलीको समर्थन लिने प्रयास जारी राखेका छन् । यद्यपि पूर्वराष्ट्रपति विद्यादेवी भण्डारी निकट रहेको आरोप लागेका उनलाई र उनको टिमलाई ओलीले प्रदेश र जिल्ला दुवैमा ग्रिन सिग्नल दिएनन् ।