गाउँमा पुग्यो उपभोक्ता जागरण अभियान

विराटनगर । उपभोक्ता जागरण अभियान नेपालले गाउँमै पुगेर उपभोक्ता अधिकारबारे सचेतना अभियान सञ्चालन गरेको छ । 

‘जागरुक उपभोक्ता, जिम्मेवार बिक्रेता’ भन्ने नाराका साथ अभियानले उदयपुर र खोटाङका सामुदायिक विद्यालयहरूमा पुगेर उपभोक्ता जागरण गरेको हो ।

माघ १८ गते उदयपुरको उदयपुरगढी गाउँपालिकास्थित नमुना माध्यमिक विद्यालय भलायाडाँडामा उपभोक्ता जागरण अभियान चलाएको हो । 

अभियानका अध्यक्ष कृष्णप्रसाद भण्डारी ‘मार्सेली’ ले वस्तु र सेवा उपभोग गर्ने उपभोक्तालाई नजगाएसम्म बिक्रेता जिम्मेवार नहुने बताए । 

उनले ग्रामीण क्षेत्रका गाउँबस्तीमा उपभोक्ताको अधिकारबारे ज्ञानको कमी हुने र उपभोक्ताहरू ठगिने अवस्थाको अन्त्य गर्न जागरण अभियान आवश्यक रहेको बताए । उदयपुरगढी गाउँपालिकाका उपाध्यक्ष जीतबहादुर खड्कासमेतको उपस्थितिमा अभियान सञ्चालन गरिएको जनाइएको छ । 

अभियानको तर्फबाट माघ २० गते  खोटाङको  खोटेहाङ गाउँपालिका–८ स्थित सिम्पानी माध्यामिक विद्यालयमा समेत सचेतना अभियान चलाइएको जनाइएको छ । 

वडाध्यक्ष चन्द्रबहादुर थापासमेतको उपस्थितिमा आयोजित उपभोक्ता सचेतना अभियानमा संस्थाका सचिव अधिवक्ता रामजनक कट्वालले उपभोक्ताको स्वास्थ्य र सम्पत्तिको संरक्षणको सवालमा वस्तु र सेवाका बिक्रेताहरू जिम्मेवार नभएको बताए ।

उपभोक्ताको हकअधिकारका लागि विद्यार्थी, शिक्षक, जनप्रतिनिधि, व्यवसायी र विद्यालय व्यवस्थापन समितिका पदाधिकारीहरूले समेत भूमिका निर्वाह गर्न सक्ने बताए । कार्यक्रममा उपभोक्ता अधिकार, बजार व्यवस्थापन, सेवा प्रदायक, आमउपभोक्ता र उपभोक्ता अधिकारको सूचना र पैरवीबारे जिम्मेवार निकायले आफ्नो भूमिका निर्वाह गर्नुपर्नेमा जोड दिइएको थियो ।

अभियानका क्रममा लिच्किराम्चेको संघीय आधारभूत विद्यालयमा समेत उपभोक्ता सचेतना कार्यक्रम गर्दै जागरुक उपभोक्ता र जिम्मेवार बिक्रेता नारा उल्लेखित जानकारीमुलक ब्रोसर उपलब्ध गराइएको अध्यक्ष मार्सेलीले बताए ।