‘एउटै योजनामा दुईतिरबाट गएको बजेट कार्यान्वयन हुँदैन’

विराटनगर । कोशी प्रदेश सरकारका भौतिक पूर्वाधार विकासमन्त्री भुपेन्द्र राईले एउटै योजनामा दुईतिरबाट बजेट हालेर खर्च गर्न खोज्ने प्रवृत्ति अन्त्य गर्न खोजिएको बताएका छन् । उनले दोहोरो बजेट विनियोजन भएका योजनाको बजेटलाई प्रदेश सरकारले कार्यान्वयन नगर्ने पनि बताएका हुन् ।

भौतिक पूर्वाधार विकास मन्त्रीका रुपमा काम गरेको १०० दिन पुगेको अवसरमा आइतबार मन्त्री राईले आफूले गरेका कामको फेहरिस्त सुनाएका थिए । उनले कार्यान्वयनमा गइसकेका बजेट कटौति गर्ने बिषयमा भने सरकारले कुनै पनि निर्णय नगरेको स्पष्ट पारे । सरकारले बाढी पहिरो लगायतका विपद्का कारण कोशी प्रदेशको पूर्वाधारका क्षेत्रमा भएको क्षतिलाई पुनर्निर्माण गर्न मन्त्रालयले काम गरिरहेको मन्त्री राईले दाबी गरे ।

‘अघिल्लो सरकारले ल्याएको बजेटको कार्यान्वयनको मोडेलमा सरकारले सामान्य छलफल गरेको हो, दुई दलीय संयन्त्रमा पनि सामान्य रुपमै कुराकानी भएको हो’ मन्त्री राईले भने, ‘बजेट कटौति गरिहाल्ने भन्ने होइन, सवै बजेट पुनरावलोकन गर्न सकिंदैन पनि, तर एउटै योजनालाई दुईतिरबाट बजेट गएको अवस्थामा भने कार्यान्वयन नगर्नु भनेको हो ।’

मन्त्री राईले प्रदेश सरकारले कार्यान्वयन गर्न कठिन हुने केही योजनाहरूलाई लगानी सम्मेलनमा ‘सोकेश’ मा राखिने पनि स्पष्ट पारे । उनले आफू भौतिक पूर्वाधार विकासमन्त्री भइसकेपछि रुग्ण अवस्थामा रहेका प्रदेशका पाँचवटा योजनाको स्थलगत अनुगमन गरेको जानकारी दिंदै अनुगमनकै कारण निर्माण व्यवसायीले काम सुरु गरेको दाबी गरे ।

‘निर्माण व्यवसायीले सम्पर्कमा आएर काम गरेकोले ठेक्का नै तोड्ने अवस्थामा अहिले हामी पुगेका छैनौं, प्रगति नभएको अवस्थामा भने ठेक्का तोड्न पनि हामी तयार छौं’ उनले भने ‘अब हामी ३ महिनामा गरिसक्ने र एक बर्षभित्र गरिसक्ने कामको सूची बनाउँछौं, सोही अनुसार रुग्ण योजनामा ध्यान दिंदै पूननिर्माणलाई पनि अघि बढाउँछौं ।’

मन्त्री राईले कोशी प्रदेशभित्र विभिन्न नदी तथा खोलामा पक्की पुल निर्माण भएपश्चात प्रयोगविहिन बनेका र जिर्ण अवस्थामा रहेका झोलुङ्गे पुललाई स्थानान्तरण गर्ने निर्णय गरेर कार्यान्वयनमा लगिएको बताए । 

रणनैतिक सडक सञ्जाल पहिचान र वर्गीकरणका लागि प्रदेश सार्वजनिक सडक ऐन २०७७ को मापदण्ड अनुसार प्रादेशिक सहायक लोकमार्ग अन्तरगत ९६ वटा सडक (३१६३ दशमलव ५८ किलोमिटर) र प्रादेशिक मार्ग २८९ वटा (५८१५ दशमलव ५० किलोमिटर) सडकलाई प्रादेशिक सडक सञ्जाल सूचीमा समावेश गर्ने निर्णय समेत  भइसकेको उनले जानकारी दिए ।

त्यसैगरी २०८१ असोज १० देखि १२ सम्मको अविरल वर्षापछि आएको बाढी पहिरोले कोशी प्रदेशका सडक, पुल र झोलुङ्गे पुलमा करीव ४ अर्व ६३ करोड ५० लाख रुपैयाँ बराबरको क्षति भएकोले सरकारले पुनर्निर्माणको योजना अघि बढाइसकेको दाबी गरे ।

यसै अवधिमा खोटाङको जन्तेढुंगा गाउँपालिका–१ देविस्थानस्थित बुवाखोलामा प्रदेश सरकारले निर्माण गरेका मध्ये हालसम्मकै सवैभन्दा लामो पक्की पुल निर्माणको प्रक्रिया अघि बढाइएको जानकारी दिए । त्यस्तै खोटाङमै साँघुधारा–बिहीबारे हुँदै माङ्हिम कृषि सडक स्तरोन्नतिको काम अघि बढाइएको बताए । ताप्लेजुङमा निर्माणाधिन ५० शय्याको जिल्ला अस्पतालको स्थलगत अनुगमन सम्पन्न गरिसकेर निर्माणलाई तिब्रता दिन निर्देशन गरिएको बताए ।

मन्त्री राईले आफ्नै गृहजिल्ला अन्तरगत खोटाङकै रसुवाघाटदेखि सिम्पानी हुँदै पान्धारे सडक कालोपत्रे गर्ने कार्य पनि सुरु भइसकेको जानकारी दिएका छन् ।