सरदारको थेरापीले लाखौंलाई लाभ

विराटनगर, २३ मंसिर : उनको हातमा दुई वटा स–साना लौरोका टुक्रा हुन्छन् । शरीरको जुनसुकै भागमा नशाको समस्या भए पनि उनी त्यही लौरोले थिचेर निको पार्छन् । ६७ वर्षीय बनझरु सरदारसँग उपचार गर्न मेचीदेखि महाकालीका बिरामी आउने गरेका छन् ।

मोरङको ग्रामथान–७ नेताचोक घर भएका सरदारको थेरापीबाट उपचारमा आएका ९० प्रतिशत मानिस निको हुने गर्छन् । उनले उपचार थालेको ३८ वर्षमा केही लाख मानिसका दुखाइ कम गरिसकेका छन् ।  सातामा कम्तीमा ५ सय जनालाई सेवा दिंदै आएका सरदार भन्छन् ‘निको भएकैले त होला सुदुरपश्चिमका मानिसहरू पनि आउँछन्, काठमाडौंका त कति आए कति ।’

उनले गर्ने उपचार परम्परागत शैलीको छ । नशाको समस्याले थला परेका मानिसलाई ठमठमी हिंड्ने बनाउँदै आएका सरदार यो थेरापी भने उनकी हजुरआमाबाट सिकेका हुन् ।

हजुरआमाले पनि उनकी बुढीहजुरआमाबाट सिकेकी रहिछन् । हजुरआमा गाउँमा हड्डी र नशाको समस्या भएका मानिसलाई जडीबुटीबाट निको पार्थिन् । हजुरआमाले बनझरुलाई ७ वर्षको उमेरदेखि यसबारे जानकारी दिंदै आएकी थिइन् ।

२०३७ सालमा हजुरआमा बितेपछि बनझरुले सिकेको कुरा सबै बिर्सिएका थिए । उनका भाइको एक दिन हात भाँचियो । कोशी अस्पतालमा निको नभएपछि उनी चिन्तित भएर बसेका थिए । सपनामा हजुरआमाले उनलाई फलानो ठाउँमा गएर मैले चिनाएको जडीबुटी ल्याएर बाँधिदिनू भनेकी रहिछन् । भोलिपल्टै उनले त्यसो गरे । ‘भाइको हात जोडियो, अनि अरुको पनि सेवा गर्न थालेँ’ उनले भने ।

सरदार घरमा शनिबार र मंगलबार बिरामी हेर्छन् । सोमबार सुनसरीको झुम्कामा, बुधबार दमकमा र हरेक १५ दिनमा बिहीबार काठमाडौंको कुलेश्वरमा सेवा दिन जाने गरेका छन् । उनको घरमा परपरका बिरामी बेलुका नै बास बस्नेगरी आउने गर्छन् ।

विराटनगरका नशाका रोगीहरू ठूलो संख्यामा बिरामी उनी कहाँ पुग्ने गरेका छन् । नेपाली कांग्रेसका नेता कृष्ण कार्की सरदारलाई साताको एक दिन विराटनगरमा सेवा दिन आउन आग्रह गरिएको बताउँछन् ।

‘धेरै मानिसको सेवा गरेर निको पारेको सुनेपछि मैले पनि उनीसँग भेट गरेँ’ हड्डीको समस्या भएर विराटनगरमै मसाज गराउँदै आएका कार्कीले भने ‘उनलाई विराटनगरमा आउने वातावरण बनाउने पहल गर्नुपर्छ ।’

विराटनगरका व्यवसायी मुकेश सिंघानियाले उनका ८० वर्षीय बाबुको समस्या समाधान गर्न सरदारलाई पनि देखाएका थिए । बाबुको समस्या निको नहुने खालको भएकाले सरदारले लामो प्रयास गरेको सिंघानियाले बताए ।

केही वर्षअघि सरदार विराटनगरको बरगाछीमा आएर सेवा दिने गर्थे । चिकित्सकहरूले नै बिरोध गरेपछि आफू विराटनगर नआई अन्यत्र मात्रै गएर सेवा दिने गरेको उनी बताउँछन् । सरदारले धेरै जना चिकित्सकलाई पनि सेवा दिइसकेका छन् ।

विराटनगरका व्यवसायी सोम अधिकारी सरदारको सेवा बारे धेरै सुनेको बताउँदै उनले विराटनगरमा पनि सेवा बिस्तार गरे धेरैले लाभ पाउने बताउँछन् ।