दुई बर्ष कैद र ८ लाख बढि जरिवाना तोकिएका दुई फरार व्यक्ति पक्राउ

उदयपुर । दुई वर्ष कैद र ८ लाख ६८ हजार ६ सय ४५ रुपैयाँ जरिवाना तोकिएका दुई जना फरार प्रतिवादीहरू पक्राउ परेका छन् ।

पक्राउ पर्नेमा उदयपुरको त्रियुगा नगरपालिका–१२ का ५४ वर्षीय वालसेर राई र त्रियुगा–५ खारखोलाका ६७ वर्षीय तेज बहादुर राना मगर रहेका छन् ।

प्रहरीका अनुसार राईलाई उच्च अदालत विराटनगरको २०७९ चैत ३ गतेको फैसलाले लेनदेन मुद्दामा २ वर्ष कैद र ५ लाख रुपैयाँ जरिवाना हुने आदेश गरेको थियो ।

त्यस्तै मगरलाई सर्वोच्च अदालतको २०८० बैशाख २९ को फैसलाले वन मुद्दामा ३ लाख ६८ हजार ६ सय ४५ रुपैयाँ जरिवाना तोकेको थियो ।

जिल्ला प्रहरी कार्यालय उदयपुरले उनीहरुलाई पक्राउ गरी फैसला कार्यान्वयनका लागि उदयपुर जिल्ला अदालतमा पेश गरेको छ ।