एकीकृत समाजवादी मोरङ अधिवेशन : अध्यक्षमा नौ जनाले दर्ता गरे मनोनयन

विराटनगर । नेकपा एकीकृत समाजवादी मोरङको अध्यक्ष पदका लागि नौ जनाको उम्मेदवारी परेको छ । विराटनगरस्थित होटल मनास्लुमा मंगलबार सुरू भएको नवौं जिल्ला अधिवेशनबाट चुनिने ९१ सदस्यीय जिल्ला कमिटीको सात पदाधिकारीमा २१ जनाले उम्मेदवारी दर्ता गराएका हुन् ।

अध्यक्ष पदका लागि निर्वतमान् बनेका चन्द्रवीर राईसहित उद्वव पोखरेल, दीपक ढकाल, लक्ष्मीकुमार श्रेष्ठ, कविराज घिमिरे, पुरुषोत्तम सुवेदी, हितबहादुर थापा, पदम सुब्बा र ध्रुव डाँगीले मनोनयन दर्ता गरेको निर्वाचन कमिटीले जनाएको छ ।

अध्यक्षमा मनोनयन दर्ता गरेका पोखरेल निवर्तमान कमिटीका उपाध्यक्ष हुन् । त्यस्तै ढकाल, श्रेष्ठ र घिमिरे प्रदेश कमिटी सदस्य रहेका छन् । सुवेदी, सुब्बा र डाँगी भने जिल्ला कमिटी सदस्य हुन् । अध्यक्ष पदमा उम्मेदवारी दिएका थापा भने कानेपोखरी गाउँ कमिटीका अध्यक्ष रहेको जनाइएको छ । 

दुई उपाध्यक्ष पदका लागि डिबी थापा, भुपाल बस्नेत, वीरेन्द्र यादव र सुमित्रा राईले उम्मेदवारी दिएका छन् । एक सचिव पदका लागि प्रेमराज भारती, तुलसी ढकाल र साइमन रेग्मीको मनोनयन दर्ता भएको जनाइएको छ ।

त्यस्तै दुई उप–सचिवका लागि पाँच जनाको उम्मेदवारी दर्ता भएको छ । सन्तोष लिम्बू, मोहन पोखरेल, भवानी धमला, राधाकृष्ण पोखरेल र चन्द्र शर्मा पराजुली उप–सचिवका उम्मेदवार हुन् ।

निर्वाचन कमिटीले अध्यक्षसहित पदाधिकारीका लागि मनोनयन शुल्क वापत एक हजार रूपैयाँ र सदस्य पदमा पाँच सय रूपैयाँ तोकेको थियो । पदाधिकारीमा धेरै उम्मेदवारी परेपछि नेतृत्व व्यवस्थापनका लागि केन्द्रीय कमिटीका नेतादेखि जिल्लास्थित नेताहरू खटिएका छन् ।

बुधबार साँझसम्म पनि पदाधिकारीमा सहमति नभएपछि निर्वाचनमा जाने कि नजाने भनेर नेताहरू अलमलमा परेका छन् । 

अध्यक्ष पदका लागि पोखरेल र ढकालबीच सहमति भए निवर्तमान अध्यक्ष राईले मैदान छाड्ने जनाइएको छ । तर दुवै पक्षले आफू निकट केहीलाई अध्यक्ष पदमै मनोनयन दर्ता गर्न उकासेको भन्दै राईले पनि उम्मेदवारी कायमै राखेर अघि बढ्ने भन्दै दबाब बढाएका छन् ।

जिल्ला कमिटीमा प्रत्येक निर्वाचन क्षेत्रबाट ६ जनाको दरले प्रतिनिधित्व हुने जनाइएको छ । त्यसबाहेक विभिन्न क्लष्टरबाट जिल्ला कमिटी सदस्य चयन हुने केन्द्रीय कमिटी सदस्य निलम ढुंगेलले बताइन् । 

जिल्ला अधिवेशनमा २ सय ३ सदस्यीय आयोजक कमिटी र २ सय ३३ जना प्रतिनिधिसहित ४ सय ३६ जना कूल प्रतिनिधि रहेका छन् ।