एभरेष्टमा २५ सयको शैक्षिक प्रदर्शनी

विराटनगर । संस्थागत विद्यालयतर्फ कोशी प्रदेशमै व्यवस्थित र भव्य ठानिने शैक्षिक प्रदर्शनी ‘एभरेष्ट एजुकेशन एक्जिबिसन’ सोमबार विराटनगरमा सुरु भएको छ ।

विराटनगर–५ स्थित एभरेष्ट सेकेन्डरी स्कुलको आयोजनामा सुरु भएको एक्जिबिसनको उद्घाटन वैज्ञानिक डा. विष्णु रायमाझीले गरेका छन् ।

एक्जिबिसन उद्घाटन गर्दै रायमाझीले यस्ता प्रदर्शनी बालबालिकाको भविष्यको आकार बनाउने माध्यम हुने बताएका छन् । उनले यस्तै एक्जिबिसनले बालबालिकालाई अन्वेषणमा लाग्न प्रेरित गर्ने बताए ।

‘एक्जिबिसनले बालबालिकालाई सिक्ने सिकाउने कुरामा धेरै अभिप्रेरणा हुन्छ’ उनले भने, ‘मेरो रुचिअनुसार अमेरिकामा पुगेर पनि विभिन्न वरिष्ठ वैज्ञानिकहरूसँग सहकार्य गर्ने अवसर जु¥यो र त्यसको परिणाम स्वरुप हामीले अल्जाइमर रोगको अन्वेषण गर्न सक्यौं । कोभिड १९ को भ्याक्सिन तथा ट्याब्लेट बनाइयो । अहिले किशोरीहरूलाई लगाइरहेको भ्याक्सिन एचपीभी अन्वेषणमा पनि हाम्रो भूमिका रह्यो ।’

उनको भनाइमा बालबालिकाको रुचिअनुसारको उनीहरूको ‘इनोभेटिभ’ कुरा वा ‘क्रिटिकल थिङकिङ’लाई अभिभावकले नजिकबाट बुझेर प्रोत्साहन गर्न सक्दा राष्ट्रिय तथा अन्तर्राष्ट्रिय स्तरमा आफ्नो क्षमता देखाउन सहयोग पुग्छ । 

विद्यालयका अध्यक्ष विनोद ढकालले एभरेष्टका बालबालिकाले आफ्नो सिकाइलाई व्यवहारिक रुपमा लागू गर्न सकून् भनेर हरेक वर्ष यस्ता कार्यक्रम गर्दै आएको बताए । उनले एभरेष्ट स्कुल उत्कृष्ट शिक्षण थलोको रुपमा आफूलाई स्थापित गर्न प्रयत्नशील रहेको बताए । 

प्राचार्य टिकाराम पुरीले विराटनगरमै विश्वस्तरीय शिक्षा प्रदान गर्ने उद्देश्य लिएर आफूहरू अघि बढेको भन्दै त्यसको परिणाम विद्यालयले हरेक क्षेत्रमा चर्चा कमाइरहेको बताए ।

राष्ट्रिय तथा अन्तर्राष्ट्रियस्तरमा एभरेष्टका विद्यार्थीहरूले हरेक क्षेत्रमा लिएको अग्रणी जिम्मेवारीले आफूहरूलाई गौरान्वित गरेको उनले उल्लेख गरे ।

उनले दुई दिवसीय एक्जिबिसन बालबालिकाले कक्षाकोठामा सिकेको सिकाइलाई ब्यावहारिक रुपमा प्रदर्शन गर्ने, अभिभावक र शिक्षक शिक्षिकाले बालबालिकाको क्षमतालाई नजिकबाट बुझ्ने अवसरको रुपमा रहेको बताए । 

दुई दिनसम्म चल्ने एक्जिबिसनमा २५ सय विद्यार्थीले आफूले सिकेका पाठ्यक्रमअनुसारका परियोजनाहरुको प्रदर्शनी गर्दैछन् ।

जस अन्तर्गत पहिलो दिन कक्षा ५ सम्मका विद्यार्थीहरूले परियोजना प्रदर्शनी गरेका छन् । मंगलबार कक्षा ६ देखि १२ सम्मका विद्यार्थीको परियोजना प्रदर्शन हुने विद्यालयका सहप्राचार्य कुन्दन पुरीले जानकारी दिएका छन् ।

‘ज्ञान सीप र रचनात्मकतासँग भविष्यको आकार’ भन्ने नाराका साथ विद्यार्थीले विभिन्न रोचक तथा ज्ञानमूलक विषयवस्तुहरूको प्रदर्शनी गरेको एभरेष्ट कलेजका सहायक क्याम्पस प्रमुख टीएन भण्डारीले बताए ।