सरकारी जग्गा मिचेर बनाइको संरचना महानगरले भत्कायो

विराटनगर । विराटनगर–१६ स्थित विराटनगर जुट मिल भित्रको सरकारी जग्गा र सार्वजनिक बाटो कब्जा गरेर एक जना व्यवसायीले बनाएको संरचना महानगरपालिकाले भत्काएको छ । नेपाल औषधि व्यवसायी संघ मोरङका उपाध्यक्ष समेत रहेका व्यावसायी जितेन्द्रकुमार रजक (जितु) ले सरकारी जग्गा हड्पेर बनाइएको व्यावसायिक संरचना महानगरले भत्काएको हो ।

रजकले सरकारी जग्गा हड्पेर संरचना बनाएका कारण त्यहाँस्थित हनुमान मन्दिर जाने बाटो बन्द भएको र नेपाल फुल कन्ट्याक कराते प्रशिक्षण स्थलमा समेत अवरोध भएको दावीसहित विराटनगर–१६ का १२३ जनाले महानगरपालिकामा उजुरी दिएका थिए ।

गत कातिक २६ गते दिएको उजुरीमाथि स्थलगत छानविन र जाँचपास गरि महानगरको न्यायिक समितिले त्यसको एक महिनापछि निवेदकका पक्षमा फैसला गरेको  थियो ।

विराटनगर महानगरपालिकाबाट खटिएको प्राविधिक टोलीले नापजाँच गर्दा रजककी पत्नी शितल पाण्डेको नाममा रहेको जग्गाले छोएको सरकारी जग्गा र सार्वजनिक वाटो कब्जा गरी रजकले आफ्नो बनाउने हिसावले आफूखुशी संरचना बनाएको देखिएको महानगरले जनाएको छ ।

संरचना बनाउँदा कुनै पनि निकायबाट अनुमति समेत नलिएको देखिएको न्यायिक समितिको फैसलामा उल्लेख गरिएको छ ।

रजककी पत्नी शीतल पाण्डेको नाममा स्रेस्ता कायम रहेको कित्ता नं १६१, १६३, १६४, १६६ र १८२ देखि उत्तर कुनाको १७ फिट, दक्षिण कुनामा १७ फिट, पूर्वतर्फको दक्षिण कुनादेखि उत्तर कुनासम्म ५८ फिट लम्बाई सार्वजनिक जग्गा मिचेर संरचना बनाएको पाइएको महानगरपालिकाको न्यायिक समितिले  गत मंसिर २६ गते गरेको फैसलामा उल्लेख छ ।

न्यायिक समितिका संयोजक तथा विराटनगर महानगरपालिकाको उपप्रमुख शिल्पा निराला कार्की, सदस्यहरू रूपा पाण्डे देउजा र तीर्थेन्द्र नेउपानेको इजलाशले गरेको फैसला अनुसार कित्ता नम्बर १६१, १६३, १६६ र १८२ को जग्गा जितेन्द्रकुमार रजककी पत्नी शीतल पाण्डेको नाउमा दर्ता स्रेस्ता कायम रहेको मिसिल संलग्न कागज प्रमाणबाट देखिएको र विपक्षी रजकले सार्वजानिक बाटो अतिक्रमण गरेको उल्लेख  छ ।

सार्वजानिक बाटोको जग्गा अतिक्रमण गरी टहरा निर्माण गरेको देखिन आएकोले उक्त मिचेको संरचना हटाइ सार्वजनिक बाटो खुलाई पाउने ठहर्छ,’ न्यायिक समितिले गरेको फैसलामा भनिएको छ ।

न्यायिक समितिले गरेको फैसला कार्यान्वयनका लागि महानगरपालिकाले नगर प्रहरी परिचालन गरेर रजकले सार्वजनिक जग्गा मिचेर बनाएको संरचना भत्काएको हो ।