जातीय भेदभावका आधारमा हुने हिंसा न्यूनीकरणमा जोड

विराटनगर । जातीय तथा लैङ्गिक आधारमा महिला र बालबालिकामाथि हुने हिंसाका घटना न्यूनीकरणका लागि सरोकारवालाहरूले जोड दिएका छन् । 

दलित महिला संघ (फेडो) मोरङको आयोजनामा आइतबार विराटनगरमा आयोजित अन्तरक्रिया कार्यक्रममा जातीय छुवाछुतका घटनाहरू धेरै हुने भए पनि राष्ट्रिय दलित आयोगमा त्यसको उजुरी अति नै कम पर्ने गरेको अभियानकर्मीहरूले बताए ।

अभियानकर्मी नरबहादुर आउजीका अनुसार जातीय तथा लैङ्गिक आधारमा महिला र बालबालिकामाथि हुने हिंसाका घटनामा फेडोले कोशी प्रदेशभरीमा २४ वटा घटनाहरूको उठानमा सहयोग गरिसकेको बताए । 

उनले हिंसामा परेका अन्य समुदायका पीडितहरू भन्दा दलित महिलाहरू बढी पीडित हुने गरेको बताए । दलित सशक्तिकरणको क्षेत्रमा स्थानीय पालिकाहरूले बजेट बढाउनु पर्नेमा उनले जोड दिए । 

कार्यक्रममा नेपाल पत्रकार महासंघ मोरङकी अध्यक्ष सुशीला पाठकले पछाडि पारिएका समुदायलाई राज्यले थप सहयोग गर्दै राज्यको मुल प्रवाहिकरणमा लैजानुपर्ने बताइन् ।

फेडोकी अध्यक्ष सर्मिला परियारले दलित समुदायले आफ्ना समस्यालाई निरन्तर उठाइरहेको बताइन् । उनले भेदभाव अन्त्यका लागि सवैको सहयोग आवश्यक रहेकोमा जोड दिइन् ।