सार्वजनिक शौचालय निर्माणका लागि एक्स्पो हुने

सुन्दरहरैंचा । सुन्दरहरैंचा उद्योग वाणिज्य संघको आयोजनामा विराटचोकमा यही माघ ३० देखि फागुन १० गते ‘सुन्दरहरैंचा विराट एक्स्पो’ हुने भएको छ । नगरको सलकपुर, विराटचोक तथा खोर्सानेमा विदेशी मापदण्डको सुविधा सम्पन्न पुस्तकालयसहितको सेलुन बाथरूम भएको तीन तल्ले सार्वजनिक शौचालय निर्माण भएको छ ।

अब अन्य स्थानमा पनि त्यस्तै शौचालय निर्माण गर्नेगरी एक्स्पोको आयोजना गर्न लागिएको आयोजकले जनाएको छ । 

नगरको विभिन्न स्थानमा बनाउन बाँकी रहेको पुस्तकालयसहितको सुविधा सम्पन्न सार्वजनिक शौचालय निर्माण सहयोगार्थ  कोष जुटाउन ‘सुन्दरहरैंचा विराट एक्स्पो ४’ सञ्चालन गर्न लागिएको महोत्सव मुल समारोह

समितिका संयोजक भोलेश्वर दुलालले जानकारी दिए । उनले चालु शौचालय परियोजनाहरू पूरा गर्न र नयाँ शुरू गरी स्रोतहरू उत्पन्न गर्न एक्स्पो महत्वपूर्ण हुने बताए ।

हाल नगरपालिकामा दुई सार्वजनिक शौचालयहरू चालू छन् । थप दुईको निर्माण भइरहेको छ । 

प्रदर्शनीबाट प्राप्त रकम हरैंचा र खोर्सानेमा निर्माणाधीन भवनमा सुविधाहरू पूरा गर्न र दुई थप सार्वजनिक शौचालयहरू थप्न खर्च गरिने आयोजकले जनाएको छ ।

एक्स्पो सञ्चालनका लागि करिव चार करोड खर्च हुने आयोजकको अनुमान रहेको छ । जसमा लक्षित विकास परियोजनाहरूको लागि रू १ करोड बचत हुने अपेक्षा गरिएको आयोजकले जनाएको छ ।

एक्स्पोमा खेलकुद, बाल उद्यान, मनोरञ्जन, अटो मोबाइल, कृषि, पर्यटन, व्यापारका साथै नयाँ प्रविधि एआईको प्रयोग र उपयोगबारे जानकारी गराउने स्टल समेत रहने आयोजकले उल्लेख गरेको छ । 

स्थानीय उत्पादन, कृषि प्रविधि, कपडा,  उद्योग, व्यापार तथा नवप्रवर्तनसँग सम्बन्धित स्टलहरू राखिने मेलाका स्टल व्यवस्थापक उपसमिति संयोजक ज्ञानप्रसाद ढकालले जानकारी दिए । उनले ७६ स्टलहरू औद्योगिक उत्पादनहरू प्रदर्शन गर्ने रहेको उल्लेख गरे  ।  

कृषि र घरेलु सामानहरू प्रदर्शन गर्ने  ५०  स्टलहरू हुने उल्लेख गरिएको छ । 

शैक्षिक संस्था, बैंक र वित्तीय संस्थाहरूलाई समर्पित ४० स्टलहरू रहने बताइएको छ । आयोजकका अनुसार, अटोमोबाइल व्यवसायका लागि २० स्टलहरू समावेश हुने छन् ।