शिक्षक सरूवामा महासंघको असहमति

विराटनगर । सुन्दरहरैंचा नगरपालिकाले हालै २१ जना मावि, निमावि र प्रावि शिक्षकहरूको आन्तरिक सरूवाप्रति चासो राख्दै नेपाल शिक्षक महासंघले असहमति जनाएको छ । 

शिक्षक सरूवा तथा दरबन्दी मिलान विषयमा सरोकारवाला संघ संस्था, विद्यालय व्यवस्थापन समिति, सम्बन्धित शिक्षक लगायतसँग छलफल गरेर मात्र अगाडि बढ्नु पर्नेमा नगरपालिकाले छलफलै नगरी शिक्षक सरूवा गरेको जनाएको छ । 

यसरी गरिएको शिक्षक सरूवाप्रति गम्भीर ध्यान ध्यानाकर्षण भएको भन्दै महासंघले विज्ञप्ति निकालेर आपत्ति जनाएको हो ।

महासंघका अध्यक्ष ठाकुरप्रसाद सुवेदी र सचिव हेमनाथ अधिकारीद्वारा हस्ताक्षरित विज्ञप्तिमा शिक्षक सरूवाप्रति असहमति जनाउँदै आगामी दिनहरूमा सहमतिबाट अगाडि बढ्न नगरपालिकालाई ध्यानाकर्षण पत्र बुझाएका हुन् ।

यस अघि सुन्दरहरैंचा नगरपालिकास्थित नेपाल शिक्षक संघ, एकीकृत अखिल नेपाल शिक्षक संगठन, प्रगतिशील नेपाल राष्ट्रिय शिक्षा संगठन र नेपाल राहत शिक्षक समितिहरूले शिक्षक सरूवा विषयमा विरोध जनाएका थिए ।

सुन्दरहरैंचा नगरपालिकाले एकलौटी तरिकाले शिक्षक सरूवा गरेकोले सरोकारवाला सबै असन्तुष्ट भएका छन् । 

शिक्षा ऐन २०२८, स्थानीय शिक्षा ऐन संविधानको अनुसूची ८ विपरीत शिक्षक सरूवा नगर्न उनीहरूले माग गरेका छन् ।