विराटनगरको 'एक्स्पो' लाग्ने जग्गा तीन व्यापारिक घरानाले टुक्रयाएर बेच्ने तयारीमा

विराटनगर । विराटनगर–२ शंकरपुरको दुई विघा दुई कठ्ठा जग्गा विराटनगरका तीन ठूला व्यापारिक घरानाले टुक्राएर घडेरीमा बेच्ने भएका छन् ।

विशाल ग्रुप, मुन्दडा ग्रुप र राठी ग्रुपको संयुक्त स्वामित्वमा रहेको सो जग्गा टुक्र्याएर बिक्री गर्न लागिएको हो ।

दशकौं अघि सो जग्गा तीन व्यापारिक समूह मिलेर यति ट्राभल्ससँग खरिद गरेका थिए ।

उक्त जग्गा राजपरिवारका सदस्य हेलेन शाहको नामको यति ट्राभल्सले पञ्चायतकालमै खरिद गरेको थियो । पछि यति ट्राभल्सले बिक्री गरेको हो ।

विराट अस्पतालको नजिकै रहेको चारपाटा मिलेको सो जग्गाको चारैतिर पिच रोड छ । कोशी राजमार्गको नजिकै पर्दछ ।

विशाल ग्रुप, राठी ग्रुप र मुन्दडा ग्रुप मिलेर सो ठाउँमा अस्पताल सञ्चालन गर्ने उद्देश्यले आशिर्वाद अस्पतालको होर्डिङ बोर्ड पनि राखिएको थियो ।

तीनै व्याफारिक घराना मिलेर एकमुष्ट जग्गा बिक्री गर्न खोज्दा बिक्री नभएपछि टुक्राएर प्लटिङ गरी बेच्न लागेको जग्गाधनी प्रकाश मुन्दडाले बताए । 

धुरको हिसाबले मूल्य राखी जग्गा बिक्री गर्न लागेको उनले बताए । टुक्र्याइने जग्गाको मूल्य भने अहिले नै यकिन नभएको उनले बताए । 

सो खाली जग्गामा विगतदेखि नै ठुला व्यापारिक मेला र राजनीतिक दलहरुको आमसभास्थल बन्दै आएको थियो ।