Biratnagar, Morang, Nepal
२१ चैत २०८१, बिहिवार
+977 21 450305, 515728, 578305
मनोरञ्जन

गायक योगेश्वर अमात्यले गाए, तीन दशक थन्किएको ‘कुनै दिन अवश्य पाउने छौँ...’

उद्‌घोष सम्वाददाता
२४ भदौ २०८१, सोमवार

काठमाडौँ, २४ भदौ ।  ‘कुनै दिन अवश्य पाउने छौँं, कुनै दिन अवश्य रुनेछौँ’ सरोज बाँस्तोलाले रचेको यो गीत तीन दशकअघि सङ्गीतकार ओमविक्रम विष्टको हातमा परेको थियो ।

उनले उक्त गीत आफ्नै आवाजमा रेकर्ड गरे । तर, सार्वजनिक भने गर्न पाएनन् । यत्तिकै थन्किएर बसेको तीस वर्ष पुरानो गीतलाई अर्का गायक योगेश्वर अमात्यले जीवन्त बनाउन चाहें ।

गीत सङ्गीतको क्षेत्रबाट १२ वर्षसम्म मौन बसेका गायक अमात्यले यही थन्किएको गीत आफ्नो आवाजमा रेकर्ड गरेका छन् । आफ्नै युट्युबमा गीत सार्वजनिक गरेका गायक अमात्यले रासससँग भने, “ओम दाईले मेरै लागि थाति राखे जस्तो लागेको छ ।” गीतलाई गायक अमात्यले पुनः एरेन्ज गरी आफ्नो आवाजमा रेकर्ड गर्नुको साथै श्रव्यदृश्यसहित प्रस्तुत गरेका छन् ।

गायक अमात्यका ‘जब सन्ध्या हुन्छ,’ ‘लैजा चरी,’ ‘सिन्धुली गढी,’ ‘म मरे पनि मेरो देश,’ ‘मलाई प्यारो लाग्छ’ जस्ता कालजयी गीत लोकप्रिय छन् ।

गायक अमात्यको यस नयाँ गीतले दर्शकलाई पुनः उनिप्रति आकर्षित गराउने विश्वास व्यक्त गरेका छन् । सङ्गीतकार विष्टले अमात्यको गीत सार्वजनिक भएपछि तीस वर्ष निर्जीव भएको गीतले जिवन्तता महसुस गरेको बताए ।

‘कुनै दिन’ गीतको श्रव्यदृश्यमा सुव्रत आचार्यको कन्सेप्ट र निर्देशन रहेकोछ भने क्रिएटिभ निर्देशक जया शर्मा रहेका छन् ।

श्रव्यदृश्यमा कलाकार प्रवीण खतिवडा, करुणा श्रेष्ठ र विकाश लामिछानेले अभिनय गरेका छन् । श्रव्यदृश्यमा आशिम रानाभाटको विशेष उपस्थिति रहेको छ ।

श्रव्यदृश्यको निर्माण व्यवस्थापन दीपेन्द्र गौतमले गरेका छन् । यसमा सह निर्देशन साईव्रत आचार्यको छ । उत्सव दाहालले छायाङ्कन गरेको श्रव्यदृश्यका सम्पादक तथा रङ संयोजक विकास दाहाल छन् । गीतमा गोपाल रसाइलीको सङ्गीत संयोजन रहेको छ ।  रासस

View : 268

Copyright © 2023 -2025. Udghosh Daily. All Rights Reserved