ब्यानरमा देउवाको फोटो नभएपछि....

विराटनगर : नेपाली कांग्रेस जिल्ला कार्यसमिति मोरङको प्रथम जिल्ला सम्मेलनको मुल ब्यानरमा पार्टी सभापति शेरबहादुर देउवाको फोटो नराखेको भन्दै केही नेताहरु मञ्चबाटै असन्तुष्टि पोखेका छन् ।

जिल्ला सम्मेलनको प्रमुख अतिथि रहेका नेता डा शेखर कोइरालाको मात्रै फोटो राखेर कार्यक्रमको ब्यानर बनाइएको भन्दै उनीहरुले विरोध जनाएका हुन् ।

ब्यानरमा देउवाको फोटो नभएपछि संस्थापन पक्षका नेताहरुको दवावमा अलग्गै फोटो छापेर मञ्चको ब्यानरको छेउमा टेप लगाएर टा“सिएको थियो । त्यसरी राखिएको फोटो ब्यानरभन्दा बाहिर परेको भन्दै पुनः विरोध भएपछि ब्यानरभित्रै पर्ने गरी फोटो राखियो । त्यतिन्जेल सम्मेलनमा सहभागी नेता कार्यकर्ताहरुबीच हल्लाखल्ला समेत भएको थियो ।

जिल्ला सम्मेलनलाई शुभकामना दिने क्रममा कांग्रेस राष्ट्रिय सभा संसदीय दलका नेता तथा कोशी प्रदेश समितिका उपाध्यक्ष रमेशजंग रायमाझीले मञ्चबाटै असन्तुष्टि जनाए । उनले जिल्ला सम्मेलनमा पार्टी सभापतिको देख्न नपाएको बताए ।

‘सभापतिको फोटो देख्न पाइएन, यो के हो ? कांग्रेसको जिल्ला सम्मेलन गर्दैछौं भने सभापतिको फोटो राख्न किन छुट्यो वा बिर्सियौं ?’ उनले भने, ‘यसमा जिल्ला सभापतिज्यूले ध्यान दिनुपर्छ, अहिले ल्याएर फोटो टाँसिदैछ, अघिसम्म किन नदेखेको ? ब्यानर बनाउँदा किन यस्तो गल्ती भयो ?, सच्याउनु पर्छ ।’

रायमाझीले प्रश्न उठाएपछि कार्यक्रम सञ्चालक रहेका कांग्रेस मोरङका सचिव ललित श्रेष्ठले गल्ती भएको स्वीकार गरे । उनले भने– ‘हामी क्षमा चाहन्छौं, यसमा हामीले सच्याउने प्रयास गरेका छौं, त्रुटि स्वीकारेका छौं ।