कार्यसम्पादनमा विराटनगर महानगर दोस्रो

विराटनगर । कार्यसम्पादन मूल्याङ्कनमा मुलुकका ६ वटा महानगरपालिकामध्ये विराटनगर महानगर दोस्रो भएको छ । 

राष्ट्रिय प्राकृतिक स्रोत तथा वित्त आयोगले सार्वजनिक गरेको कार्यसम्पादन मूल्याङ्कनमा विराटनगरले ७३ दशमलव ५ प्रतिशत अंक ल्याई दोस्रो भएको हो । 

आयोगले विभिन्न १७ वटा सूचकहरूको आधारमा कार्यसम्पादन मूल्याङ्कन गर्ने गरेको बताइएको छ । 

ती सूचकहरूमध्ये पालिकाले समयमै सभामा बजेट पेश गरे नगरेको, पारित गरे नगरेको, खर्च अवस्था, बेरूजु, लेखा परीक्षणले औल्याएको बेरुजु, स्थानीय सञ्चित कोष व्यवस्था प्रणालीको प्रयोग, आवधिक योजना गरे नगरेको, राजस्वको विभाजन गरे नगरेकोलगायत रहेका छन् । 

आयोगका अनुसार भरतपुर महानगरले ७६ दशमलव २ प्रतिशत अंक ल्याएर पहिलो हुँदा वीरगञ्ज महानगरले ४३ दशमलव १ प्रतिशत अंक प्राप्त गरेर छैटौं अर्थात् अन्तिम भएको छ । 

तेस्रो हुने ललितपुर महानगरले ६६ दशमलव ७ प्रतिशत, चौथो हुने काठमाडौं महानगरले ५४ दशमलव ३ प्रतिशत र पाँचौ हुने पोखरा महानगरले ५१ दशमलव ५ प्रतिशत अंक प्राप्त गरेका छन् ।

कार्यसम्पादन मूल्याङ्कनमा विराटनगर दोस्रो हुनुले महानगरका लागि खुसी र गौरवको क्षण भएको मेयर नागेश कोइरालाले प्रतिक्रिया दिए । 

विराटनगरभन्दा स्रोत साधनले अब्बल महानगरहरुलाई उछिन्नु नै खुसीको क्षण भएको उनको भनाइ थियो ।