कोशीटप्पुबाट कोशी प्रदेश पर्यटन वर्षको तयारी, बैठकका नाममा निर्णयविहीन आमसभा

सुनसरी । आगामी वर्ष २०८२ साललाई ‘पर्यटन वर्ष’ घोषणा गरेको कोशी प्रदेश सरकारले पहिलो बैठक नै निर्णयविहीन आमसभा गरेको छ । बैठकमा हजार जनाभन्दा बढी सहभागी भए पनि बैठक निर्णयविहीन बनेको छ ।

पर्यटन वर्षको तयारीको सुरुवात भएको जानकारीसहितको मुल आयोजक समितिको पहिलो बैठक बिहीबार कोशीटप्पुमा गरिएको थियो । 

विश्व पर्यटन दिवसको अवसर पारेर गत सेप्टेम्बर २७ मा प्रदेश सरकारका मुख्यमन्त्री हिक्मतकुमार कार्कीले ‘कोशी प्रदेश पर्यटन वर्ष, २०८२’ को घोषणा गरेपछिको मुल समितिको बैठक नै निश्कर्ष बिना टुङ्गिएको पर्यटनकर्मीले बताएका छन् ।

बैठकका नाममा आमसभा नै गरिएको थियो । सुनसरीको कोशी गाउँपालिका–३ स्थित अक्वा रिसोर्टमा गरिएको सभामा सहभागी ९ सय जनाका लागि आयोजक पर्यटन मन्त्रालयले खानाको कुपन वितरण गरेको थियो । 

रिसोर्ट सञ्चालक सुरज गिरीका अनुसार कुपन भन्दा बढीले खाना खाएकाले मन्त्रालयसँग त्यसको माग दाबीको तयारी गरिएको छ ।

पर्यटन वर्ष मनाउनका लागि मुख्यमन्त्री हिक्मतकुमार कार्कीको अध्यक्षतामा गठित मुल आयोजक समितिको पहिलो बैठक नै निर्णय नभई सकिएको छ । 

मुल आयोजक समितिका सदस्य सचिव तथा पर्यटन मन्त्रालयका सचिव विशाल घिमिरेले बैठक सकिए पनि पछि निर्णय गरिने बताएका छन् । 

प्रदेश सरकारले विशेष प्राथमिकता दिएर मनाउन लागेको पर्यटन वर्षको कार्यक्रमको पहिलो बैठक नै निर्णय विहीन बनेपछि सदस्यहरूले यसको आलोचना गरेका छन् । 

बैठकले पर्यटन वर्षको तयारी गर्न प्रदेशभरीका पर्यटकीय क्षेत्रको पहिचान गरी त्यसको प्रवद्र्धनमा अघि बढ्ने निर्णय गर्नुपर्ने थियो । 

कोशीटप्पुबाट सुरू बैठकको निर्णय प्रदेशका हरेक जिल्लामा कार्यान्वयन गर्ने पनि निर्णय गर्नुपर्ने थियो । 

प्रदेश सरकारले पर्यटन वर्ष मनाउने तयारीका लागि ४५ करोड ४१ लाख रुपैयाँ बजेट बिनियोजन गरेर कार्यक्रम सुरु गरेको छ । 

बढी सदस्य भएकाले पनि बैठक आमसभा जस्तो भएको पर्यटन वर्ष निर्देशन समितिका सहसंयोजक कृष्ण शँहले बताए ।

पर्यटन वर्ष २०८२ मा १५ लाख बढी पर्यटक भित्र्याउने प्रदेश सरकारको तयारी रहेको बैठकमा जानकारी दिइएको छ । 

‘धेरै सदस्य भएकाले बैठक भन्दा पनि घोषणासभा जस्तो भयो, सभाबाट सदस्यहरूलाई आ–आङ्खनो ठाउँबाट पर्यटन वर्षलाई सहयोग गर्न भनिएको छ’ निर्देशन समितिका अर्का सहसंयोजक भविषकुमार श्रेष्ठले भने । 

भारत, चीन, बंगलादेश र भुटान लगायतका देशबाट बढी पर्यटकहरू भित्र्याउने लक्ष्यका साथ तयारी अघि बढाइएको पर्यटन, वन तथा वातावरण मन्त्री सदानन्द मण्डलले बताए ।

सुनसरीबासी मन्त्री भएको मन्त्रालयले नेतृत्व गर्ने पर्यटन वर्ष मनाउने कार्यक्रमको पहिलो बैठकले कोशीटप्पुको सम्भावना र पछाडि पारिनुको कारण बारे चासो नलिइएको स्थानीयको भनाइ छ । 

स्थानीयवासी खड्गबहादुर मगरले प्रदेशभरीका मानिस आएर पर्यटन वर्षका नाममा ठुलो कार्यक्रम गरे पनि नेपालमा चराको राजधानी भनेर चिनिने कोशीटप्पुबारे खासै चर्चा नहुनुले स्थानीय दुःखी भएको बताए ।

‘रमणीय कोशी’ भन्ने नाराका साथ प्रदेश सरकारले २०८२ साललाई कोशी पर्यटन वर्ष घोषणा गरिएको समितिमा ५ सय भन्दा बढी सदस्य छन् । 

बैठकमा सहभागी सदस्यहरूले प्रस्ताव सुन्न पाएका छन् न त निर्णयमै सुझाव दिन पाएका छन् । पर्यटन मन्त्रालयले निर्णय सार्वजनिक गरेपछि मात्रै त्यसमा उनीहरूले मौन समर्थन गर्नुपर्ने बाध्यता छ । 

समितिमा रहेका सुनसरीका एक सदस्यले भने, ‘बैठक भनेर गएको वनभोज जस्तै मासुभात आएर आइयो ।’

पर्यटन वर्षका लागि सरकारले ८२ वटा पर्यटकीय गन्तव्यको सूची तयार पारिएको छ । सरकारले पर्यटन वर्ष मनाउन चालु आर्थिक वर्षका लागि १० करोड रुपैयाँ बजेट विनियोजन गरेको जनाएको छ । 

२०८२ बैशाख १ गते तेह्रथुमको तिनजुरे मिल्के जलजले क्षेत्रबाट ‘कोशी प्रदेश पर्यटन वर्ष, २०८२’ को औपचारिक उद्घाटन गर्ने प्रदेश सरकारको तयारी छ ।