पत्रकार नेपाल पुरस्कृत

विराटनगर । प्रेस चौतारी नेपालको २७ औं स्थापना दिवसको अवसरमा पत्रकार हरिहर नेपाललाई कृष्णप्रसाद सिग्देल स्मृति युवा पत्रकारिता पुरस्कार प्रदान गरिएको छ । 

प्रेस चौतारी नेपाल जिल्ला समिति मोरङले हरेक वर्ष प्रदान गर्दै आएको उक्त पुरस्कार यसपटक पत्रकार नेपाललाई प्रदान गरिएको हो । पुरस्कार राशि १५ हजार एक सय ५ रुपैयाँ रहेको छ ।

कोशी प्रदेशका आन्तरिक मामिला तथा कानुन मन्त्री रेवतीरमण भण्डारीले उक्त पुरस्कार र सम्मानपत्र पत्रकार नेपाललाई प्रदान गरेका हुन् । 

मन्त्री भण्डारीले पत्रकारिता क्षेत्रले राज्यलाई सही बाटोमा ल्याउन महत्वपूर्ण भूमिका खेल्ने बताए । तर मिसन पत्रकारिताका नाममा नभएका तथ्य तोडमोड भएर समाचार आउने गरेको उनले गुनासो गरे ।

मन्त्री भण्डारीले श्रमजीवी पत्रकारहरूलाई अहिले पनि समस्या रहेको भन्दै पत्रकारहरूको समस्या समाधान गर्न सञ्चार प्रतिष्ठानको काम अघि बढिरहेको बताए ।

सोही अवसरमा विद्यावारिधि (पीएचडी) गर्ने प्रेस चौतारी मोरङका संस्थापक सचिव डा. डिल्ली पोखरेल र पूर्वसचिव डा. धर्मराज ढकाललाई सम्मान गरिएको थियो । 

पोखरेलले नेपालको आर्थिक विकासमा कृषि सहकारी संस्थाहरूको भूमिका विषयमा विद्यावारिधि गरेका हुन् । त्यस्तै ढकालले नेपाली कटन उद्योगहरूमा कार्यरत मजदुरहरूको उत्प्रेरणा र कार्य सम्पादनको अवस्थाबारे विद्यावारिधि गरेको जनाइएको छ ।

कार्यक्रममा प्रेस चौतारी मोरङका अध्यक्ष चीना थापाको नेतृत्वमा सर्वसम्मत निर्वाचित जिल्ला कार्यसमिति, प्रदेश प्रतिनिधि र केन्द्रीय प्रतिनिधिहरूलाई चौतारीको कोशी प्रदेश महासचिव बाबुराम भण्डारीले निर्वाचन समितिको तर्फबाट सम्बन्धित पदहरूमा निर्वाचित भएको प्रमाण पत्र प्रदान गरेका थिए ।

स्थापना दिवस कार्यक्रममा प्रेस चौतारी नेपालका केन्द्रीय सचिव विक्रम लुईंटेल, नेकपा एमाले मोरङका अध्यक्ष बाबुराम कार्की, प्रेस चौतारी कोशी प्रदेश अध्यक्ष अविजाल बिष्ट, समाजवादी प्रेस संगठन कोशी प्रदेशका अध्यक्ष बन्धु पोखरेल, नेपाल पत्रकार महासंघ मोरङ अध्यक्ष सुशीला पाठक लगायतले शुभकामना दिएका थिए ।