राष्ट्रिय सौन्दर्यकर्मी युनियन कोशीद्वारा शुभकामना आदान–प्रदान

विराटनगर । नेपालीहरूका विभिन्न चाडपर्वहरूको अवसरमा राष्ट्रिय सौन्दर्यकर्मी युनियन कोशी प्रदेशले शुक्रबार विराटनगरमा शुभकामना आदान–प्रदान कार्यक्रम सम्पन्न गरेको छ । कार्यक्रममा युनियन आवद्ध सदस्यहरू सहित विभिन्न क्षेत्रका आमन्त्रितहरूले शुभकामना साटासाट गरेका छन् । 

कार्यक्रमकी प्रमुख अतिथि विराटनगर महानगरपालिकाकी उपमेयर शिल्पा निराला कार्कीले महानगरपालिकाले केहिदिन भित्रैबाट पेशाकर्मी महिलाहरूको तथ्याङ्क संकलनको काम शुरु गर्न लागेको बताइन् । उनले सङ्कलन गरिने तथ्याङ्कमा महिलाहरूको पेशा र रुचिलाई समेटिने जानकारी दिइन् । 

उपमेयर कार्कीले पछिल्लो समय महत्वपूर्ण चाडपर्वहरू कुनै समुदाय विशेषले मनाउने मात्र नभई सबै बर्ग समुदायले मनाउन थालेको बताइन् ।

उक्त अवसरमा नेपाल ट्रेड युनियन महासंघ (जिफन्ट) का कोशी प्रदेश अध्यक्ष किशोर धमलाले स्थानीय निकायहरूले विभिन्न पेशा व्यवसायमा रहेका महिलाहरूको तथ्याङ्क नभएको बताएका थिए । उनले महिलाहरूलाई सामाजिक सुरक्षामा सहभागी गराउन पनि तथ्याङ्क आवश्यक रहेको बताए ।

युनियनकी कोशी प्रदेश अध्यक्ष कला डाँगीले चाडपर्वको अवसरमा आफ्ना सदस्य र शुभेच्छुकहरू बिच अपनत्व बढाउने र सद्भावको भावना अभिवृद्धि गर्न शुभकामना कार्यक्रम आयोजना गरिएको जानकारी दिइन् । उनले चाडपर्वहरूले नेपालको मौलिक संस्कृति संरक्षणमा समेत सहयोग पुग्ने बताइन् । 

कार्यक्रममा युनियनका महानगर अध्यक्ष भलि सुब्बासहित प्रदेशका विभिन्न पालिकामा रहेका सदस्य सौन्दर्यकर्मीहरूको उल्लेख्य सहभागिता रहेको थियो ।