विराटनगरका दुई च्याम्पियन सम्मानित

विराटनगर । नेपालमै प्रथम र भारतमा गएर चार देशका खेलाडीसग प्रतिस्पर्धा गरी तेस्रो हुने दुई जनालाई विराटनगरको राजधानी युवा क्लवले सम्मान गरेको छ ।

विराटनगर–३ का १७ वर्षीय सुप्रिम पन्तले १७ वर्ष मुनिका ब्याडमिन्टन खेलाडीमा नेपाल प्रथम भएका थिए । उमेर समूह तर्फबाट समूह खेलमा पूर्व प्रहरी निरीक्षक जीवन बोगटी भारतमा तेस्रो भएका थिए ।

दुबैलाई शनिबार विराटनगर–३ स्थित क्लवको हलमा उपहार दिएर सम्मान गरिएको छ ।

प्रहरी नायव महानिरीक्षक चन्द्रकुँवेर खापुङ, क्लवका अध्यक्ष राजु ढकाललगायतले उनीहरुलाई ब्याडमिन्टनमा विराटनगरको गहना भएको जनाउँदै सम्मान गरेका हुन् ।

काठमाडौमा हालै सम्पन्न राष्ट्रिय प्रतियोगितामा त्रिभुवन आर्मी क्लवबाट खेलेका पन्त प्रथम भएका थिए ।

क्वाटर फाइनलमा सशस्त्र प्रहरी क्लवका अरुण अधिकारीलाई पन्तले पराजित गरेका थिए ।

पोखरिया उच्च मावि विराटनगर–३ बाट गत वर्ष एसईई उत्तीर्ण गरेर खेललाई ब्यवस्थित बनाउंन राजधानी पुगेका उनी काडमाडौंका श्रमिक शान्ति उच्च माबिमा ११ कक्षामा अध्ययनरत छन् । नेपाली सेनाको क्लव मार्फत खेल्न थालेका उनी इमाडोलस्थित क्लव सेभेनमा तालिमरत छन् ।

यस्तै भारतको आसामको राजधानी गुहाटीमा हालै सम्पन्न अन्तर्राष्ट्रिय प्रतियोगितामा उमेर समूहबाट राजधानी युवा क्लवका प्रतिनिधि भएर गएका बोगटीले तेस्रो स्थान हासिल गरेका थिए । उनको जोडी इटहरीका उदय थापा रहेका थिए ।

भारत, नेपाल, भुटान र वंगलादेशका खेलाडी सहभागी सो प्रतियोगिता र गत वर्ष भारतकै दार्जिलिङमा प्रथम स्थान हासिल गरेको दुबै पदक बोगटीले क्लवलाई हस्तान्तरण गरेका छन् ।