खेलाडी र शिक्षकलाई सम्मान, जेहेन्दार विद्यार्थीहरुलाई छात्रवृत्ति

विराटनगर । विराटनगर(उस)/विराटनगरको आदर्श माध्यमिक विद्यालयले स्थापनाको ९५औं वार्षिकोत्सव तथा अभिभावक दिवस मनाएको छ । बिहीबार आयोजित बार्षिकोत्सवका अवसरमा सोही विद्यालयको कक्षा १२ मा अध्ययन अन्तर्राष्ट्रिय खेलाडी एलिस मरिक, उत्कृष्ट शिक्षक भगिरथ पोखरेलसहित जेहेन्दार विद्यार्थीहरुलाई सम्मानित गरिएको हो ।

पोखरेललाई उत्कृष्ट शिक्षकका रुपमा सम्मान गरेको जनाइएको छ । विद्यालयले पर्वतकुमार श्रेष्ठ, लालबहादुर गुरुङ, अजित चापागाईं, प्रवेश दुलालसहित विभिन्न संकायका संयोजकहरुलाई पनि सम्मान गरिएको जनाइएको छ । स्थापना दिवसकै अवसरमा सफाई कर्मचारीहरु रिङ्की मरिक र अम्विकाकुमारीलाई पनि विद्यालयले दोसल्ला ओढाएर सम्मानपत्र प्रदान गरेको हो । 

आदर्श विद्यालय काठमाडौंको दरबार हाइस्कुल पछि स्थापित दोस्रो हाइस्कुल रहेको दाबी छ । विद्यालय स्थापना दिवसको अवसरमा विद्यालयले साँस्कृतिक कार्यक्रम, सप्ताहव्यापी खेलकुद प्रतियोगिताका विजेतालाई पुरस्कार वितरण गरिएको जनाइएको छ । सोही अवसरमा विद्यालयले विज्ञान प्रदर्शनी र रक्तदानसमेत गरेको थियो ।

वार्षिकोत्सवको उद्घाटन गर्दै विराटनगर महानगरपालिकाका प्रमुख नागेश कोइरालाले अबको शिक्षा प्रविधिमैत्री र गुणस्तरीय हुनुपर्ने जोड दिए । उनले कक्षा १२ उत्तीर्ण गरी विदेश पलायन हुने विद्यार्थीलाई सरकारले छात्रवृत्ति तथा सुविधा लिएर देशभित्रै उच्च शिक्षा अध्ययन गर्ने वातावरण मिलाउन आग्रह गरे । 

कोइरालाले व्यवहारिक र सीपमुलक शिक्षा वर्तमान युगको आवश्यकता रहेको बताए । उनले आदर्श विद्यालयमा मुलुकका पूर्वप्रधानमन्त्रीहरु गिरिजाप्रसाद कोइराला, नगेन्द्रप्रसाद रिजाल, मनमोहन अधिकारी, सूर्यबहादुर थापा र कीर्तिनिधि बिष्टलगायत विभिन्न क्षेक्रका बिशिष्ट व्यत्तिहरुले समेत अध्ययन गरेको बताए । सोही कारण विद्यालयको गरिमा उचो रहेको बताए ।

विद्यालय व्यवस्थापन समितिका अध्यक्ष विकास पराजुलीको अध्यक्षतामा आयोजित कार्यक्रममा पाँच दर्जन बढी विद्यार्थीलाई छात्रवृति वितरण गरिएको थियो । विद्यालयका प्रधानाध्यापक सन्तोष पोखरेलले स्वर्गीय कृष्णप्रसाद कोइरालाले झारत निर्वासनको क्रममा वित्रम सम्वत् १९८१ सालमा भारतको विहारको टेढीस्थित दिपनगरमा विद्यालयको स्थापना गरेको जानकारी दिए । 

निर्वासनपछि विराटनगर फर्किने क्रममा सोही विद्यालयलाई कोइरालाले विराटनगरमा ल्याएर स्थापना गरेको दावी गरे । विद्यालय स्थापनाकालका शिक्षक रघुनन्दनलाल दाससहित विराटनगर आएर कोइराला निवासमै विद्यालयको स्थाफना गरेको जनाइएको छ । कोइराला निवासबाट विसं १९९५ मा अहिलेको स्थानमा विद्यालय सारिएको हो ।

वार्षिकोत्वसको अवसरमा आयोजित रक्तदानमा ४५ जनाले रत्तदान गरेका छन् । सो अवसरमा विद्यालयमा अध्ययनरत विज्ञान संकायका विद्यार्थीले बनाएको पानीबाट उड्ने रकेटको परीक्षण उडान गरिएको थियो । उक्त अवसरमा विद्यालयका २६० जना विद्यार्थीहरुले देशझक्तियुत्त गीतमा नृत्य प्रस्तुत गरेका थिए ।

आदर्श विद्यालयमा हाल बाल कक्षादेखि कक्षा १२ सम्म ३ हजार ४७४ विद्यार्थी अध्ययनरत रहेका छन् । उनीहरु मध्ये ९६ जना अपाङ्गता भएका विद्यार्थीहरु रहेको जनाइएको छ । 

विद्यालयमा १ सय १३ शिक्षक र कर्मचारी कार्यरत रहेको विद्यालयले जनाएको छ । आदर्श विद्यालय २०८० सालको शिक्षा दिवसको अवसरमा प्राविधिक शिक्षातर्फ मुलुककै सर्वोत्कृष्ट सामुदायिक विद्यालयको रुपमा पुरस्कृत भएको विद्यालय हो । 

वार्षिकोत्सवमा मोरङका प्रमुख जिल्ला अधिकारी प्रेमप्रसाद भट्टराई, शिक्षा विकास तथा समन्वय इकाई प्रमुख टंकप्रसाद गौतम, सामाजिक विकास मन्त्रालय कोशी प्रदेशका उपसचिव दामोदर फुयाल, नेपाल शिक्षक महासंघ विराटनगरका अध्यक्ष वेदु खतिवडा, पोखरिया माविका प्रअ खेमराज भट्टराई, मिल्स माविका प्रअ बिन्दुकुमार लावती, सत्यनारायण माविका प्रअ पुरुषोत्तम गुरागार्इं, आदर्श बालिका माविका प्रअ रमेश नेपाललगायतको सहभागिता थियो ।