प्रदेश सम्मेलनलाई प्रभावित पार्न कोइराला पक्ष समानान्तर भेला गर्दै

विराटनगर । मोरङको ग्रामथानसहित देशैभरी उपनिर्वाचन हुनै लाग्दा नेपाली कांग्रेस कोशीभित्र भने तीव्र गुटगत असन्तोष देखिएको छ । पार्टीको संस्थापन पक्ष र संस्थापन इतर पक्षबीचको यो टकरावले आउँदो साता केही दिनको फरकमा विराटनगरमा कांग्रेसका दुइटा ठूला भेला आयोजना हुँदैछन् ।

कांग्रेस कोशी प्रदेश मंसिर २२ मा पहिलो प्रदेश सम्मेलन गर्ने तयारीमा जुटेको छ । पार्टी सभापति शेरबहादुर देउवासहितका पदाधिकारीहरुलाई उपस्थित गराएर सम्मेलन गर्ने तयारी अन्तिम चरणमा पुगेका बेला डा शेखर कोइराला पक्षले विराटनगरमै त्यसअघि नै अर्को भेला आयोजना गर्दैछ । 

मोरङका पार्टीका १७ वटै पालिकालाई  आयोजक बताउँदै कोइराला पक्षले मंसिर १८ मा प्रदेशभरीका सबै पालिकाका सभापतिहरुको भेला र प्रशिक्षण राखेको छ । संस्थापन पक्ष र इतर पक्षले केही दिनको फरकमा दुई फरक भेला आयोजना गर्दा कांग्रेसभित्र गुटगत प्रतिष्पर्धा चर्केको अनुमान कार्यकर्ता पंक्तिको छ । 

संस्थापन पक्षका नेताहरु शेखर पक्षले पार्टीको कार्यक्रम असफल पार्न उस्तै समय पारेर समानान्तर भेला गर्न लागेको आरोप लगाइरहेका छन् । 

पार्टीका कोशी सभापति एवम् पूर्व मुख्यमन्त्री उद्धव थापाले पालिका सभापतिहरुको भेलाबारे पार्टीलाई केही जानकारी नभएको बताएका छन् । 

‘कांग्रेस कोशी प्रदेश समिति मंसिर २२ मा विराटनगरमा हुने प्रथम प्रदेश सम्मेलनको अन्तिम तयारीमा पुगेको छ । विभिन्न उपसमितिहरु गठन गरेर काम तीव्र रुपमा अघि बढिरहेको छ’, प्रदेश सम्मेलनबारे जानकारी दिन बिहीबार विराटनगरमा आयोजित पत्रकार सम्मेलनमा थापाले भने ‘हामी प्रदेश सम्मेलनकै व्यस्ततामा छौं । अर्को भेलाबारे हामीलाई केही जानकारी छैन ।’

सभापति थापाले संस्थापनइतर पक्षको भेलाप्रति लक्ष्य गर्दै त्यस्तो भेलाको वैधानिकतामाथि नै प्रश्नसमेत उठाएका छन् । ‘त्यस्तो भेलाबारे हामीलाई जानकारी छैन यदि त्यस्तो आयोजना हुन लागेको हो भने त्यसको वैधानिकतामाथि प्रश्न उठ्नसक्छ’ उनले भने । 

पार्टीलाई जानकारी नै नदिई प्रदेशभरी रहेका १३७ पालिकाकै सभापतिहरुको भेला गर्दा प्रदेश सम्मेलन प्रभावित हुँदैन भन्ने प्रश्नमा सभापति थापाको जवाफ थियो ‘त्यो भेलामा सहभागी हुने र प्रदेश सम्मेलनमा सहभागी हुनेहरु फरक व्यक्तिहरु हुन्छन् । त्यसले खासै फरक पार्दैन । तर, त्यसबारे हामीलाई जानकारी नभएको चाहिं हो ।’

सभापति थापाका अनुसार प्रदेश सम्मेलनमा पार्टीका केन्द्रीय पदाधिकारी, पूर्व पदाधिकारी, केन्द्रीय सदस्य, जिल्ला सभापतिहरु, प्रतिनिधिसभा क्षेत्रीय सभापतिहरु, महासमिति सदस्य, महाविधेशन प्रतिनिधि, पालिका सभापति, प्रतिनिधिसभा तथा प्रदेश अधिवेशन प्रतिनिधिहरु सहभागी हुनेछन् । 

बन्दसत्रमा भने ६४८ जना प्रतिनिधिहरु सहभागी हुने र सोही सत्रले कांग्रेस कोशीको राजनीतिक, सांगठनिक र आर्थिक प्रतिवेदनमाथि छलफल गर्दै पारित गर्नेछ । 

प्रदेश पार्टीले आफ्नो विधान अनुसार प्रदेश सम्मेलन आयोजना गरेकै बेला संस्थापन इतर पक्षले पार्टीलाई जानकारी नै नगराई किन छुट्टै भेला आयोजना गर्न लागेको हो ? पालिका सभापतिहरुको भेलाको संयोजन गरिरहेका कांग्रेस विराटनगर महानगर सभापति दीपक चापागाईंलाई उद्घोषले यो प्रश्न सोधेको थियो । 

बिहीबार साँझ उनले भने ‘मोरङका १७ वटै पालिकाका पार्टी समितिहरु आयोजक भएर गरिएको भेला हो । हामीले जिल्ला समितिलाई जानकारी गराएर गरेका छौं ।’ 

शेखर कोइराला पक्षका नेता चापागाईंले पार्टीका वडा र पालिकास्थित समितिहरुले कार्यक्रम गर्दा प्रदेशलाई भन्दा जिल्लालाई जानकारी दिनुपर्ने बताउँदै आफूहरु दुईटै भेला सफल पार्न लागेको दाबी गरे । आफूहरुले मोरङ पार्टीलाई जानकारी गराएको उनले बताए ।

मोरङ सभापति शेखर पक्षकै डिगबहादुर लिम्बू छन् । प्रदेश सभापति थापा भने संस्थापन पक्षका हुन् । संस्थापनभित्रको पनि सिटौला समूहका थापाले आफूहरुलाई जानकारी नगराएको भन्दै पालिका सभापति भेलाबारे घुमाउरो रुपमा असन्तोष प्रकट गरेका हुन् । 

पालिका भेलाका आयोजकहरु भने आफूहरुले भन्दा प्रदेश पार्टीले मिति जुधाउन खोजेको बताइरहेका छन् । ‘पार्टीको प्रदेश सम्मेलनको भन्दा धेरै अघि नै तय भएको कार्यक्रम हो हाम्रो’, महानगर सभापति चापागाईंले भने ‘बरु पार्टी प्रदेश समितिले पर्याप्त छलफल नगरी सम्मेलनको मिति तय गरेको हो । जे भए पनि दुवै भेला पार्टीकै भएकाले हामी सफल पार्न लागेका छौं ।’ 

तपाँईहरुले आयोजना गर्ने पालिका सभापतिहरुको भेलामा प्रदेश सभापति उद्धव थापालाई वोलावट हुन्छ कि हुन्न ? यसको जवाफमा उनले भने ‘बकाइदा हुन्छ । शेखर कोइराला प्रमुख अतिथि बन्नु हुन्छ । सभापतिज्यूसहित पार्टीका सबै नेताहरु हाम्रो कार्यक्रममा आउनुहुन्छ ।’

संस्थापन समूहका नेता सभापति, उपसभापति  र महामन्त्री रहेको प्रदेश समितिले आयोजना गर्ने प्रदेश भेलाभन्दा अघि नै शेखर पक्षले अर्को भेला राखेर सो पक्षले १५ औं महाधिवेशनको तयारी थालेको आरोप संस्थापन पक्षका नेताहरु लगाउँछन् ।

१४ औं महाधिवेशनमा सभापतिमा शेरबहादुर देउवासँग पराजित शेखर कोइरालाले १५ औं महाधिवेशनमा फेरि सभापति लड्ने घोषणा गरिसकेका छन् ।  उपनिर्वाचनको मुखैमा यस्तो गुटगत अभ्यासले राम्रो नगर्ने भन्दै कोशी संस्थापनका नेताहरु आक्रोशित सुनिन्छन् ।