निजी जग्गामा माफियाको बाटो

विराटनगर । घर बनाउन लामो अवधि घडेरी खाली राख्दा भूमाफियाले त्यसको दुरुपयोग गर्न सक्छन् भन्ने उदाहरण धेरै ठाउँमा देख्न सकिन्छ । त्यस्तो जग्गामा स्थानीय सरकारले पनि बाटो बनाउने खतरा उत्पन्न भएको विराटनगरको एक घटनाले देखाएको छ ।

विराटनगर महानगरपालिकाको वडा नं. १४ भगवती टोलमा वर्षौदेखि खाली राखिएको १९ धुर जग्गा प्लटिङ गरेर बिक्री गर्नेहरूले बाटो बनाई दिएपछि जग्गाधनीले विरोध जनाएका छन् ।

बाटो रोक्न जग्गाधनीले महानगर र अदालतलाई आग्रह गरेका छन् । राकेशनन्द बैद्यले आफ्नो निजी जग्गामा सरकारी बाटो खुल्दै गरेको पाएपछि महानगरका मेयर नागेश कोइराला, वडाध्यक्ष सूर्यनारायण यादव, टोल समाजका अगुवा नानीकाली श्रेष्ठ, सोमनाथ कोइरालाविरुद्ध अदालतमा मुद्दा दिएका छन् ।

उच्च अदालत विराटनगरमा दिइएको मुद्दामा जग्गाका सँधियारहरूलाई पनि विपक्षी बनाइएको छ । रुपन्देही जिल्लाको बुटवल–१० मा बस्दै आएका बैद्यले वारेस बिरेनकुमार साह मार्फत माघ २६ मा दिएको मुद्दामा अदालतले दुबै पक्षलाई बुधबार छलफलका लागि बोलाएको छ । विराटनगरको मिल्स एरियामै जन्मिएर हुर्किएका बैद्य पेशाका क्रममा बुटवलको बासिन्दा भएका थिए ।

उनका बाबु दिब्यानन्द बैद्य जीवित रहँदा दुई छोरालाई घर बनाउन पुग्ने गरी १९ धुर जग्गा खरिद गरिदिएका थिए । छोराहरू पेशाका क्रममा बाहिर बस्नुपर्ने भएकाले सो जग्गा धेरै वर्ष खाली थियो । कानुन ब्यवसायी कमल लामाका अनुसार भोगचलन नभएको पाएपछि स्थानीयले अरुको निजी जमिनमा बाटो खेलेर स्थानीय तहको बजेट परिचालन गर्न लागेका छन् ।  

गत वर्ष बैद्यले महानगरपालिकाको न्यायिक समितिमा पनि निवेदन दिएका थिए । ‘हामी बाहिर बस्नुपर्ने भएकाले घर बनाउन राखेको जग्गामा बाटो बनाए छन्’ बैद्यले भने ‘जग्गाबाट कमाउनेहरूले आफ्नो फाइदाका लागि मेरो घडेरी मास्न खोजेका रहेछन् ।’

दक्षिण मुख रहेको उनको घडेरीमा पश्चिमतर्फबाट २० फिटको बाटो बनाउन थालिएको छ । उनको मात्रै जग्गा प्रयोग गरी बनाउन थालिएको सो बाटोमा ६ धुर जग्गा जान्छ ।

मुख नभएको जमिन भूमाफियाले भित्री भागबाट प्लटिङ गरेका थिए । घरहरू बन्न थालेपछि बाटोको अभाव हुन थालेको थियो ।

प्लटिङ गर्नेहरूकै जोडबलमा आफ्नो जग्गाबाट बाटो खोल्ने प्रयास भएको थियो । अरुको निजी जग्गालाई बाटो देखाएर जग्गा बिक्री गर्नेहरूले नै बाटो खोल्ने र स्थानीय तहको बजेट हाल्ने प्रयास भएको बैद्यले बताए ।