Biratnagar, Morang, Nepal
२२ चैत २०८१, शुक्रवार
+977 21 450305, 515728, 578305
खेलकुद

बुढासुब्वा गोल्डकप

पेनाल्टी सुटआउटबाट काँकडभिट्टालाई हराउँदै एनआरटी फाइनलमा

शनिबार हुने फाइनलमा एन्फा मोरङसँगको सामना गर्ने
उद्‌घोष सम्वाददाता
१ चैत २०८०, बिहिवार

सुनसरी । २४ औं संस्करणको अन्तर्राष्ट्रिय आमन्त्रण बुढासुब्वा गोल्डकपको उपाधिका लागि न्युरोड टिम एनआरटी फाइनल प्रवेश गरेको छ । बिहीबारको सेमिफाइनलमा काँकडभिट्टा फुटबल ट्रेनिङ सेन्टर झापालाई पेनाल्टी सुटआउटमा ५–४ गोल अन्तरले पराजित गर्दै एनआरटीले फाइनलमा एन्फा मोरङसँगको भेट पक्का गरेको हो । 

धरान रङ्गशालामा भएको पहिलो सेमिफाइनल खेलबाट आयोजक धरान फुटबल क्लबलाई पराजित गर्दै एन्फा मोरङ फाइनलमा प्रवेश गरिसकेको छ । 

बिहीबारको दोस्रो सेमिफाइनलको निर्धारित ९० मिनेटको खेलमा दुबै टिमले १–१ गोल गरेपछि खेलको निर्णय सिधै पेनाल्टी सुटआउटबाट लिएको हो । पेनाल्टीमा एनआरटीका गोलरक्षक प्रमञ्जय गच्छदारले उत्कृष्ट बचाउ गर्दै टोलीलाई फाइनलमा पुर्‍याएका हुन् । खेलको अन्तिम समयमा पुजन होनाको ठाउँमा मैदान प्रवेश गरेका गच्छदारले काँकडभिट्टाका विशाल घलानको प्रहार बचाउ गरेका थिए । 

काँकडभिट्टाका दिवस उराव, विमल घर्ती मगर, अभिषेक गुरुङ र देवेन्द्र तामाङले मात्र गोल गरे । एनआरटीका लागि सरोज तामाङ, जय गुरुङ, शिशिर लेखी, मोहित गुरुङ र सनम लिम्बुसहित पाँचै जनाको प्रहार गोलमा परिणत भएको थियो ।

पहिलो हाफको निर्धारित खेल समयको ४४ औं मिनेटमा फोडेफोफनाले गोल गरेर काँकडभिट्टालाई अग्रता दिलाएका थिए । पहिलो हाफको थपिएको ३ मिनेटमै एनआरटीका सरोज तामाङले फ्रिकिकमार्फत गोल गरेर एनआरटीलाई बराबरी ल्याएका थिए । पहिलो हाफमा १–१ गोलको बराबरी खेलेका दुबै टिमले दोस्रो हाफमा पाएका अवसरहरूलाई सदुपयोग गर्न सकेनन् । 

खेलको म्यान अफ दि म्याच एनआरटीका सरोज तामाङ भए । उनले नगद १० हजार पाए । शनिबार हुने फाइनल खेलको विजेताले ट्रफीसहित नगद १० लाख रुपैयाँसहित ट्रफी उचाल्ने छ । उपविजेताले नगद ५ लाख रुपैयाँ पाउने आयोजकले जनाएको छ ।

View : 511

Get In Touch

Biratnagar, Morang, Nepal

+977 21 450305, 515728, 578305

udghosh@gmail.com

Copyright © 2023 -2025. Udghosh Daily. All Rights Reserved