माओवादीका माझीले 'म एमालेको उम्मेदवार' भनेपछि....

विराटनगर । तामझामका साथ मनोनयन दर्ताका लागि उम्मेदवारहरू मुख्य निर्वाचन अधिकृतको कार्यालयमा पुग्दै थिए । आफूनै लोकप्रिय उम्मेदवार भएको दाबी गर्न केही उम्मेदवार मिडिया खोज्दै थिए । केही भने खोजेर आउने मिडियालाई आफ्नो उत्कृष्टता बताउने र चुनावी आश्वासन सुनाउने होडबाजीमा देखिन्थे ।

उम्मेदवारहरूले आफूले नै चुनाव जित्ने भन्दै दाबी पनि गरे । आफूले जिते शिक्षा, स्वास्थ्य, रोजगारी उपलब्ध गराउनेदेखि विकास निर्माणका कामलाई प्रभावकारी बनाउने, भ्रष्टाचार हटाउनेलगायतका विगतकै झैं चुनावी आश्वासन उम्मेदवारहरूले बाँडे ।

आफु ठिक र अरु बेठिक कै नीतिमा उम्मेदवारहरू देखिए । उम्मेदवारहरू विपक्षी दलका उम्मेदवारलाई कमजोर देखाउन चर्को आलोचनामा उत्रिने गरेका कारण मनोनयन दर्ताका क्रममा एक उम्मेदवार भने नमज्जाले चिप्लिए । 

माउ दलकै नेताको सिको गरेर विपक्षीको आलोचना गर्न केन्द्रित हुँदा उम्मेदवारहरूले आफु चुनाव लडेकै पार्टीको नाम बिर्सिने अवस्थामा पुगेका देखिन्थे । आइतबार तेतरियास्थित ग्रामथान गाउँपालिकाकै कार्यालयमा रहेको मुख्य निर्वाचन अधिकृतको कार्यालयमा मनोनयन दर्ताका लागि पुगेका नेकपा माओवादी केन्द्रका उम्मेदवार नमोनारायण माझीले पनि त्यस्तै गरे ।

मनोनयन दर्ता गर्न मुलगेटबाट भित्र प्रवेश गरेका माझीले आफू माओवादी केन्द्रबाट उम्मेदवार बनेको कुरा नै बिर्सिए । पटक–पटक दल फेरेको आरोप लागेका माझीले आफू एमालेको उम्मेदवार भन्न भ्याए । 

‘म नमोनारायण माझी, नेकपा एमालेबाट’ यति भन्न नपाउँदै उनलाई माओवादी प्रवेश गराउनेदेखि उम्मेदवार बनाउनेसम्मको जिम्मा पाएका सांसद अमनलाल मोदीले ‘एई’ भन्दै माझीलाई झस्काए । 

माझीले पनि हतारहतार ‘सरी है, नेकपा माओवादी’ भनेर आफ्नो दल सम्झिए । माझी माओवादीबाट उम्मेदवार बन्नुअघि कांग्रेस थिए । उनी तीन महिना अघिमात्रै कांग्रेस छाडेर माओवादीमा प्रवेश गरेका थिए ।

मोदीले चुनावी अभियानका क्रममा एमालेको विरोध गर्ने गरेका कारण एमालेको धेरै पटक नाम लिनु परेकोले आफ्नो पार्टीको उम्मेदवारले परिचयमा पनि एमालेकै नाम लिएको भन्दै सच्याउने प्रयास गरेका थिए ।