ग्रामथानमा प्रमुख दलहरूले टुङ्ग्याए उम्मेदवार

विराटनगर । अध्यक्ष पदका लागि मंसिर १६ हुन लागेको मोरङको ग्रामथान गाउँपालिकाको उपनिर्वाचनमा नेकपा एमालेले शनिबार उम्मेदवार टुंगो लगाएसँगै प्रमुख दलहरू चुनावी प्रचार प्रसारमा केन्द्रित बन्ने भएका छन् । एमालेले सवैभन्दा ढिलो गरी अध्यक्ष पदमा तुलसीराम विश्वासलाई उम्मेदवार बनाउने निर्णय गरेको हो ।

तीनजना आकांक्षीहरू मध्येबाट विश्वासलाई पार्टीको केन्द्रीय नेताहरूले उम्मेदवार बनाउने निर्णय गरेको एमाले केन्द्रीय सदस्य एवं मोरङ जिल्ला इञ्चार्ज जीवन घिमिरेले बताए । जिल्ला र प्रदेशस्तरका नेताहरूको छलफलबाट एमाले कोशी प्रदेश कमिटीले कृष्णकुमार माझी, तुलसीराम विश्वास र निर्मला अधिकारीमध्ये एकजनालाई उम्मेदवार बनाउन केन्द्रमा सिफारिस गरेको थियो ।

उनीहरूमध्ये एमाले ग्रामथान गाउँ कमिटीको उपाध्यक्ष रहेका विश्वासलाई उम्मेदवार बनाउने निर्णय भएको घिमिरेले जानकारी दिए । ग्रामथानमा एमालेसहित नेपाली कांग्रेस, माओवादी केन्द्र, राप्रपा, नेकपा एकीकृत समाजवादी, जनमत पार्टी लगायतले उम्मेदवार टुंगो लगाएर चुनावी प्रचार प्रसारमा जुटेका छन् ।

कांग्रेसबाट पूर्व महासमिति सदस्य बलराम सरदार अध्यक्षको उम्मेदवार छन् । माओवादी केन्द्रबाट भने कांग्रेस छाडेर दुई महिनाअघि मात्रै माओवादी प्रवेश गरेका नमोनारायण माझी उम्मेदवार चयन भएका छन् । 

नेकपा एकीकृत समाजवादीले दिलबहादुर विकलाई उम्मेदवार बनाउने निर्णय गरिसकेको पोलिटव्यूरो सदस्य महेश रेग्मीले जानकारी दिए ।

राप्रपाले यसअघि उम्मेदवार बनेका पखुलाल विश्वाससहित आकांक्षीहरू मध्येबाट सोमबार बेलुकासम्ममा उम्मेदवार टुंगो लगाउने जनाइएको छ । राप्रपा मोरङका सभापति गोपाल कटुवालले चारजना आकांक्षी रहेको जानकारी दिंदै उनीहरू मध्येबाट उम्मेदवार टुंगो लगाउने बताए ।

विगतका निर्वाचनमा नेकपा एमाले र नेपाली कांग्रेसबीचमै मुख्य प्रतिष्पर्धा हुँदै आएको ग्रामथान गाउँपालिकामा यसपटक नेकपा माओवादी केन्द्रले भने सवैभन्दा सुरु मै उम्मेदवार टुंगो लगाएर प्रचार प्रसारमा केन्द्रित छ । 

ढिलो गरी उम्मेदवार टुङ्ग्याएका सत्ता सहयात्री नेपाली कांग्रेस र नेकपा एमालेले भने स्वस्थ प्रतिष्पर्धा गर्ने र एकअर्काको विरोध नगर्ने नीतिका साथ चुनावी अभियानमा केन्द्रित हुने तयारीमा जुटेका छन् । त्यसका लागि पहिलो चरणमा कांग्रेस र एमालेका जिल्लास्तरका नेताहरुबीच छलफल सुरु भएको स्रोतले जनाएको छ ।

‘पहिलो चरणमा दुवै पार्टीका नेताहरूले कुरा अघि बढाउनु भएको छ’ स्रोतले भन्यो, ‘सत्ता गठबन्धनमा भएकोले कांग्रेस–एमालेले स्वस्थ प्रतिष्पर्धा गर्न सहमति भएका छौं ।’ दुई दलबीच स्वस्थ्य प्रतिष्पर्धा गर्ने र माओवादीसहित अन्य दलका उम्मेदवारको कमजोरी पहिचान गरी जनतासामू लैजाने उनीहरूबीच सहमति भएको जनाइएको छ ।

ग्रामथानमा २०७४ को स्थानीय तह निर्वाचनमा एमालेका शिवनारायण माझी निर्वाचित भएका थिए । उनले तत्कालिन मधेसी जनअधिकार फोरम (लोकतान्त्रिक) बाट उम्मेदवार बनेका जयप्रकाश गच्छदार थारूलाई ५९ मतले पराजित गरेका थिए ।

तर २०७९ मा भने फोरम (लोकतान्त्रिक) र नेपाली कांग्रेस एक भएपछि पुनः कांग्रेसबाट उम्मेदवार बनेका गच्छदारले माझीलाई १ हजार ५१२ मतले पराजित गरेका थिए । त्यतिबेला कांग्रेसका गच्छदारले ७ हजार ६०५ र एमालेका माझीले ६ हजार ९३ मत प्राप्त गरेका थिए ।

उक्त निर्वाचनमा तेस्रो स्थानमा रहेको माओवादी केन्द्रका विजयकुमार सरदारले २ हजार ७२७, राप्रपाका पखुलाल विश्वासले ४४७, नेकपा एकीकृत समाजवादीका राकेश चौधरीले १३९, जनमत पार्टीका पञ्चनारायण चौधरी थारुले ९४ र नेपाल मजदुर किसान पार्टीका मनोजकुमार चौधरीले ४ मत प्राप्त गरेका थिए ।

अध्यक्षमा निर्वाचित भएका गच्छदारको निधन भएपछि ग्रामथान गाउँपालिकामा उपनिर्वाचन हुन लागेको हो । दलहरूले उम्मेदवार टुङ्गो लगाएसँगै चुनावी चहलपहल सुरु भएको छ । उनीहरुले पार्टीका वडा तहका कमिटीहरूको गठन पुनर्गठनदेखि घरदैलो, र्याली र सभा आयोजना गर्न थालेका छन् ।

निर्वाचन आयोगले मंसिर २ गते उम्मेदवारको मनोनयन दर्ता गर्ने दिन तोकिसकेको छ । मनोनयन अघि नै अन्य दलहरूले समेत उम्मदेवार टुंगो लगाउनै पर्नेछ । मंगलबार पालिकाको केन्द्र तेतरियामा निर्वाचन अधिकृतको कार्यालय स्थापना हुने जनाइएको छ ।