बर्जुमा सशस्त्रको सुरक्षा पोष्ट स्थापना

सुनसरी । भारतसँग ६२ किलोमिटर सीमा जोडिएको सुनसरीको बर्जु गाउँपालिकामा सशस्त्र प्रहरी बलले सीमा सुरक्षा पोष्ट स्थापना गरी सञ्चालनमा ल्याएको छ ।

कोरोना महामारीको समयमा स्थापना भएको फरवार्ड वेशलाई सशस्त्र प्रहरी बलले बीओपीको रुपमा सञ्चालनमा ल्याएको हो । बर्जु गाउँपालिका ४ मा स्थापना भएको उक्त बीओपीको सशस्त्र प्रहरी बल नेपाल नम्बर १ बराह बाहिनी मुख्यालय पकलीका बाहिनीपति सशस्त्र प्रहरी नायब महानिरीक्षक अञ्जनीकुमार पोखरेलले उद्घाटन गरेका छन् ।

बीओपी स्थापना भएसँगै सीमा सुरक्षा, चोरी तस्करी नियन्त्रणसँगै सीमा अपराध नियन्त्रणमा सहयोग पुग्ने सशस्त्र प्रहरीले जनाएको छ ।

उक्त बीओपीले ३ दशमलव ९ किमि क्षेत्रभित्रको ५१ वटा सीमा स्तम्भको रेखदेख, सुरक्षा र सीमा अपराध नियन्त्रण जस्ता कार्य गर्ने सशस्त्र प्रहरी बल नम्बर ४ गण हेडक्वाटर सुनसरीका प्रमुख एसपी समेनन्द बज्राचार्यले जानकारी दिए ।

बुधबार उद्घाटन भएको सो बीओपीसँगै सुनसरीमा सशस्त्र प्रहरीको बीओपी संख्या ९ पुगेको छ ।