चिसो मौसममा ६ घर आगलागी

विराटनगर । लगातार तापक्रम घटेर चिसो बढे पनि कोशी प्रदेशका पहाडी जिल्लामा आगलागीका घटनामा सात घर जलेका छन् । बुधबार अपरान्ह संखुवासभामा पाँच र खोटाङमा एउटा घर जलेका हुन् ।

१२ डिग्री आसपास तापक्रम रहेको संखुवासभाको सभापोखरी गाउँपालिका–६ बाह्रबिसे बजारमा अपरान्ह भएको आगलागीमा स्थानीय रामबहादुर राई, अमृता राई, लानसिंह राई र सुरेश तामाङका पाँचवटा घर जलेका हुन् । तामाङका दुईवटा घर जलेको जिल्ला प्रहरी कार्यालय संखुवासभाले जनाएको छ । 

अपरान्ह २ बजेतिर राम राईको घरबाट आगलागी सुरू भएको जनाइएको छ । आगलागीबाट उनीहरूका घर पूर्णरूपमा जलेर क्षति भएको छ । 

आगलागीको कारण खुल्न नसके पनि नेपाली सेना, प्रहरी र स्थानीयवासीको सक्रियतामा आगो नियन्त्रण गरिएको जनाइएको छ ।

त्यसैगरी खोटाङको बराहापोखरी गाउँपालिका–५ मौवाबोटेमा बुधबार अपरान्ह २ बजेतिरै भएको आगलागीमा एउटा घर पूर्णरूपमा जलेको जनाइको छ । 

जिल्ला प्रहरी कार्यालय खोटाङका प्रवक्ता प्रहरी निरीक्षक मोहन पोखरेलका अनुसार पदमबहादुर राईको काठले बनेको दुईतले घर पूर्ण रूपमा जलेको जनाइएको छ ।

आगलागीबाट घरमा रहेको नगद १५ हजार, सुनचाँदी, अन्नपात, लत्ताकपडा, भाँडावर्तन जलेर नष्ट भएको हो । प्रहरी र स्थानीयले लामो प्रयासबाट आगो नियन्त्रण गरेको जनाएको छ ।