सफल यात्रामा आफैले लगाएको ठेस

विराटनगर । राजनीति र कानुन व्यवसाय दुवै क्षेत्रमा सफल लिलाबल्लभ अधिकारीले आफ्नो लोभलाग्दो यात्रामा आफैले गम्भीर धक्का लगाएका छन् । मोरङ अमरदहका अधिकारी कलेज पढ्न विराटनगर आएदेखि यतै आधार बनाएर सक्रिय थिए ।  २०४९ सालको स्थानीय चुनावमा तत्कालीन अमरदह गाविसमा एमालेबाट अध्यक्षको उम्मेदवार बनेका उनी चुनावमा पराजित भएका थिए । 

२०५४ मा एमाले विभाजित हुँदा मालेतिर लागेका उनी पछि पार्टी एकता हुने क्रममा जिल्ला कमिटी सदस्य बनेका थिए । २०७४ मा मोरङ २ को प्रदेशसभा क्षेत्र नम्बर २ बाट प्रदेशसभामा निर्वाचित भएका उनी त्यसबेला एमालेमा माधव नेपाल समूहका मानिन्थे । 

प्रदेशसभाको पहिलो कार्यकालमा प्रदेशसभा नियमावली निर्माण गर्ने कामको नेतृत्व अधिकारीले नै पाएका थिए । २०७४ को अन्त्यतिर साढे ३३ किलो सुनकाण्डमा  सरकारवादी मुद्दामा आरोपीहरूको तर्फबाट मोरङ जिल्ला अदालतमा बहस गरेपछि उनी विवादमा परेका थिए ।  सुनकाण्डका आरोपीहरूको पक्षबाट वकालत गर्नुको मूल्य उनले एक वर्षसम्म प्रदेशसभामा बोल्न नपाएर चुकाउन परेको थियो । 

२०७७ पुस ५ मा तत्कालीन प्रधानमन्त्री केपी शर्मा ओलीले प्रतिनिधिसभा विघटन गरेपछि कोशीमा पनि तत्कालीन नेकपा दुईतिर भएको थियो । उनी त्यसबेला भीम आचार्यको पक्षमा उभिएका थिए । २०७७ फागुनमा सर्वोच्च अदालतले तत्कालीन नेकपा फुटाइदिएसँगै एमाले र माओवादी अलग बने । एमाले पनि त्यसपछि सग्लो रहेन । एमाले फुटेर एकीकृत समाजवादी जन्मियो । 

२०७८ भदौ १० मा भीम आचार्य प्रदेशको मुख्यमन्त्री बन्दै माधव नेपालको साथ छाड्ने निर्णयमा पुग्दा लीलाबल्लभ अधिकारी पनि आचार्यसँगै एमालेमै रहे ।

आचार्यलाई मुख्यमन्त्री बन्दा उनी आन्तरिक मामिला तथा कानुन राज्यमन्त्री बनेका थिए । पार्टी विभाजित भइसकेको, केन्द्रमा कांग्रेस, माओवादी र एकीकृत समाजवादी मिलेका कारण आचार्यले विश्वासको मत पाएनन् ।  सरकार जसै ढल्यो,  अधिकारीको मन्त्री पद पनि सँगै गयो । एकीकृत समाजवादीका राजेन्द्र राई मुख्यमन्त्री रहेका बेला  २०७९ मंसिर ४ मा चुनाव भयो । 

यही चुनाव थियो अधिकारीले आफूलाई एमालेभित्र ‘चुनाव जित्ने नेता’ का रूपमा आफूलाई स्थापित गरेका थिए । त्यसअघि वाम गठबन्धन हुँदा जितेका अधिकारीले दोस्रोपटक एमाले बाहेकका सबैजसो ठूला दलका विरूद्ध एक्लै चुनाव लड्नु थियो । यस्तो अवस्थामा पनि अधिकारी प्रदेशसभामा निर्वाचित बनेका थिए ।

चुनाव लगत्तै एमाले र माओवादी मिलेर सरकार बन्दा उनले अवसर पाएका थिएनन् । तर, हिक्मतकुमार कार्कीले २०८० भदौ २२ मा अल्पमतको सरकार बनाउँदा अधिकारी १३ दिनका लागि आन्तरिक मामिला तथा कानुन मन्त्री भएका थिए । उनी मन्त्री बनेको त्यो दोस्रोपटक थियो ।

गएको बैशाख २७ मा एमाले नेता कार्की तेस्रोपटक मुख्यमन्त्री बन्दा  अधिकारीले सोही मन्त्रालयमा तेहेरिने मौका पाए । 

जेठ ४ मा मन्त्री नियुक्त भएका अधिकारीलाई मुख्यमन्त्रीले सरकारको प्रवक्ताको जिम्मा पनि दिएका थिए । 

कानुनका जानकार र प्रष्ट वक्ता अधिकारी आफ्नो निर्वाचन क्षेत्रमा बलियो जनाधार भएको नेताका रूपमा चिनिन्छन् । खासगरी सीमान्त समुदायको बाक्लो बसोबास रहेको उनको क्षेत्रका सर्वसाधारणलाई कानुनी उपचार र स्वास्थ्योपचारका क्रममा आफै खटेर लागिपर्ने उनको बानी थियो ।

उनको यही कार्यशैलीले क्षेत्रमा उनी बलियो रहेको एमाले नेताहरू बताउँछन् । तर, आफूबाहेक अरूको कुरै नसुन्ने र सामान्य  कुरामै लोभिने उनको स्वभाव रहेको उनलाई नजिकबाट चिन्नेहरू बताउँछन् । 

‘मानव तस्करी जस्तो गम्भीर विषयमा नाम मुछिएर पक्राउ नै परिसकेपछि प्रहरीले केही न केही आधार त फेला पार्यो होला’, कोशी एमालेकै एक सांसदले भने ‘अमेरिकासहित झण्डै आधा विश्व घुमिसकेका उनी यसपटक किन लोभिएर, हतारिएर यसरी गए, आश्चर्यलाग्दो भएको छ ।’

आफ्नै मन्त्रालयका कर्मचारीहरूले प्रक्रिया पूरा नगरी नजान सुझाउदा ‘काठमाडौंसम्म पुगेर आउने’ भन्दै हिंडेका उनी शंकास्पद रूपमा जापान उडेका थिए । आफू फसेको दाबी गरिरहेका अधिकारीको भनाइमा विश्वास गर्न उनकै पार्टीका नेताहरू पनि तयार छैनन् । 

‘उनी जत्तिका मान्छे फसे होला भनेर कसरी पत्याउनु’, उनीहरूको भनाइ छ ।