कोबासमा भाडा विवाद, प्रिन्सिपल श्रेष्ठले कुटे कन्सल्टेन्सीका कर्मचारी

विराटनगर । विराटनगर नीलसदनस्थित कोबास कलेजमा भाडाका विषयमा विवाद हुँदा कलेजका सञ्चालकलाई प्रहरीले नियन्त्रणमा लिएको छ । 

कलेजले भाडामा दिएको सटरवापतको रकमका विषयमा कलेज सञ्चालक सुनिलकुमार श्रेष्ठ र मिथिला कन्सल्टेन्सीका प्रतिनिधिबीच बिवाद भएको हो ।

भाडा विवादमा कलेज सञ्चालक श्रेष्ठले कुटपिट गरेको भन्दै कन्सल्टेन्सीका प्रतिनिधिले प्रहरीमा उजुरी गरेपछि उनलाई नियन्त्रणमा लिएर छलफल चलाएको प्रहरीले जानकारी दिएको छ ।

पीडितको सूचनाका आधारमा श्रेष्ठलाई नियन्त्रणमा लिइएको प्रहरीको भनाइ छ । मोरङका प्रहरी नायव उपरीक्षक ज्ञानेन्द्र बस्नेतले दुबै पक्षबीच सहमति भएपछि उनलाई छाडिने बताए । वडा प्रहरी कार्यालय विराटनगरमा राति ९ बजेसम्म दुबै पक्षबीच छलफल चलिरहेको भए पनि मेलमिलापको सम्भावना कम थियो । 

कोबास कलेज रहेको जग्गाधनी अष्ट्रेलियामा रहेकाले कलेजअगाडिको सटरको भाडा पनि क्याम्पस प्रमुख श्रेष्ठकै दायित्वमा छ । मासिक ३० हजार रुपैयाँ भाडा बुझाउनुपर्नेमा तीन महिनाको ८७ हजार रुपैयाँ तिर्न बाँकी रहेकाले रकम माग गर्दा बिवाद भएको श्रेष्ठले बताए ।

उनका अनुसार, कलेज रहेको ८ कट्ठा जमिनको मासिक भाडा सटरसहितको जम्मा गरेर धनीलाई बुझाउने गरिएको छ । 

विदेशमा रहेका जग्गाधनीलाई जसरीप पनि भाडा बुझाउनुपर्ने भएकाले रकम माग गर्न जाँदा कन्सल्टेन्सीका प्रतिनिधिले मुख छाडेका कारण विवाद भएको उनले बताए । श्रेष्ठले आफूलाई प्रहरीले कुनै प्रकारको नियन्त्रणमा नलिएको उल्लेख गर्दै दुबै पक्षलाई छलफलका लागि बोलाएको बताए ।